[愛情走糖故]兩個人心底中不為人知嘅秘密,成為兩個人間嘅牽引: 151.不會真的是他吧⋯？

「都只係估啫，我又冇實際嘅證據…」夏學謙將啲菜放喺筲箕入面，然後沖水，腦海中突然閃出張紙條，「但佢比咗佢個電話我，仲叫我問清楚媽媽咩事之後再搵佢。」

「你諗住打比媽媽問？」夏巧莘問完之後突然眉頭一皺，「佢會唔會有機會係你親生爸爸…？媽媽當初有冇講過比你知你爸爸係咩人呀？」

「冇…」夏學謙搖搖頭，「媽媽講嘅就只有話佢係衰人，當年我親生媽媽有咗，佢就直接走咗佬，掉低咗我親生媽媽。」

「世上真係咩人都有…咁不負責任都得…」夏巧莘皺起眉頭，「如果佢真係你親生爸爸咁…你打算點呀？」

「我阿媽可以有兩個，但我阿爸只有一個，嗰個就係我養父。」夏學謙果斷地道，默默地閂上水喉，「我唔會想認番個知道女朋友有咗就即刻走佬、咁不負責任嘅人阿爸…」





「咁如果佢當初係有苦衷呢？」夏巧莘追問道

「有咩苦衷都唔應該咩都唔講就突然人間蒸發咁，佢咁樣算係一個男人嘅所為咩？」夏學謙皺起眉頭

「都係嘅…你打比媽媽問下啦！」夏巧莘將夏學謙推出廚房，「如果唔係，陣間又切手指啦！」

夏學謙無奈地笑，然後點點頭

夏學謙行番入房坐喺床上，喺掛起咗嘅校服上拎出放咗喺褲袋嘅紙仔，將張紙仔放咗喺旁邊





「問唔問媽媽好…」夏學謙拎住手機，但心中都係有啲猶疑

猶疑咗一陣次後，佢都係打電話比喺醫院嘅媽媽，心中始終都想知道

電話響咗兩響接通咗

「學謙？做咩事呀？」

「媽媽…你識唔識一個叫沈偉晉嘅人…」夏學謙望住眼前嘅男人，問喺電話裏頭嘅媽媽，「今日佢嚟搵過我…」





電話裏嘅人靜咗兩秒，先再次開口問道：「佢今日嚟搵過你？有冇同你講過啲咩？」

「佢話想見一見你，然後叫我問清楚你之後再打比佢，佢會等我搵佢咁囉…」夏學謙嘅心突然有啲緊張，「媽，佢到底係咩人，上次我去拜媽媽嗰陣見過佢…佢到底係邊個？」

電話嗰邊靜咗落嚟，冇人出聲

「媽媽？」夏學謙輕聲嗌咗一聲，心中有一絲不安，「佢唔會…就係嗰個走咗佬嘅人掛…」

「嗯…」媽媽呢個答覆，夏學謙一早就有心理準備，「原來佢番咗嚟…你話佢知我喺醫院，佢要見我就過嚟…」

「知道…」夏學謙回答完次後掛咗電話，然後將媽媽嘅身處地喺WhatsApp話咗比沈偉晉知道

…

翌日係學校假期，夏學謙同夏巧莘去咗醫院，今日唔洗番學，當然要去嗰個沉悶嘅地方陪媽媽





而且夏學謙都想知道嗰個人係咪真係會嚟

兩姊弟到咗一陣之後，一個高大嘅身影喺門口行入嚟，坐喺膠櫈上嘅夏學謙目無表情咁講住佢

呢個人，唔係沈偉晉，仲可以係邊個？

夏巧莘見夏學謙表情突變，都循住佢嘅視線望過去

「秀怡，你仲認唔認得我？」沈偉晉行到去床邊，手上拎住咗袋生果，將袋生果放咗喺床尾嘅枱上，「我買咗啲生果嚟…」

「有心啦…」媽媽微微一笑，望向夏巧莘，「將水果拎去洗一洗，番嚟切比我食呀～」

「好呀～」夏巧莘微笑着，然後起身，喺袋中拎咗兩個雪梨然後踏出病房





「個女都咁大啦？」沈偉晉微笑道，「佢都咁大個仔啦…叫咩名呀？」

「學謙，係美娜改㗎。」媽媽望向夏學謙，夏學謙露出一個淺淺嘅微笑，「你今次嚟搵我，係有咩事？」

「其實我都番咗嚟一段時間，今次係想嚟…多謝你同時係道歉…」沈偉晉苦笑道，「其實我仲想認番我個仔…」

「呢個係我個仔，同時係美娜個仔，但佢唔係你個仔…」媽媽心平氣和地道，「由美娜有咗嗰一刻開始，你已經放棄咗呢個仔。」

「我知道我當初咁樣真係好不負責任，但係嗰時嘅我冇辦法養起美娜同個BB㗎！秀怡，佢始終都係我個仔，呢個係事實。」沈偉晉捉住媽媽嘅手




IG Link: https://www.instagram.com/nd_cotttoncandy/?hl=zh-tw





回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link