[愛情走糖故]兩個人心底中不為人知嘅秘密,成為兩個人間嘅牽引: 121.因為我是你的騎士

凌御生一直坐立不安的沉默着，偶爾坐着，偶爾站着，眼眶泛紅得眼淚都快要流出嚟
凌御生抬起頭仰望着天花板，壓抑着想流眼淚嘅衝動
夏學謙同鍾家豪望住凌御生嘅一舉一動，心中不約而同地感受到凌御生其實真係好中意夏巧莘
坐咗一個幾鐘之後，Dr.Mak喺醫生房行出嚟
「已經Okay，佢應該過一陣就會醒，等佢醒咗之後你地再帶佢番去啦。」Dr.Mak微微一笑
凌御生第一個就衝咗入房，夏巧莘嘅面色開始好過嚟，唔再係好似啱啱一樣蒼白
「佢行路嗰陣，隻腳應該會有啲痛，雖然傷口唔係好深。」Dr.Mak提醒道，然後望向夏學謙，「佢沖涼嘅時候提佢傷口盡量唔好濕水，係怕污糟嘅話就用濕毛巾抹下，但記得要避開傷口位置。」
「我知道啦，唔該醫生。」夏學謙見夏巧莘好似安心咁瞓緊一樣，心中放下咗心頭大石
「傷口要消毒完再換紗布，最好每日都換一次。」Dr.Mak再提點道，「早啲番去等佢休息一下啦。」
「唔該你Dr.Mak，我遲啲過嚟找番數。」凌御生嘅手一直握着夏巧莘嘅手




「唔急，你記得就得。」Dr.Mak無奈一笑，「你地喺度等佢醒啦，我幫佢檢查過，一切都冇咩大礙。」
Dr.Mak講完就叫姑娘將夏巧莘放喺外面登記處嘅梳化上
凌御生盤腿坐喺地下，手指輕輕掃過夏巧莘嘅臉頰
夏學謙安靜坐喺夏巧莘腳邊等佢醒過嚟，夏巧莘終於平安番嚟
鍾家豪坐喺夏學謙隔離，默默等待夏巧莘醒過嚟
過咗都唔知有冇半個鐘，夏巧莘嘅眼皮動咗一動，眉頭下意識輕輕一皺，眼睛緩緩睜開，首先映入眼簾嘅係診所嘅天花板
「佢醒啦！」「你醒啦？」「家姐你見點呀？」
夏巧莘都未嚟得切知道自己喺邊，就聽到三把熟悉嘅聲音
夏巧莘用手想撐起個人坐起身，但因為已經冇食嘢兩三日，餓到冇力
「你係咪想坐起身呀？我扶你我扶你！」凌御生著緊地扶住夏巧莘等佢慢慢坐起身




三人一見夏巧莘醒過嚟，自然咁就瞬間企晒起身
夏巧莘第一個見到嘅人，係夏學謙，夏巧莘捉住夏學謙嘅手臂，夏學謙坐低喺梳化邊輕輕攬一攬夏巧莘
「今日可以番屋企啦我地～」夏學謙平日冷酷嘅聲線中多咗一份溫柔同放心
「你都喺度呀？」夏巧莘見到鍾家豪然後笑咗一笑，「多謝你地嚟救我～」
「你冇事就得啦！」鍾家豪微笑道，「但我同你細佬就收份細嘅多謝得啦，大嗰份應該由第二個嚟收。」
夏巧莘愕一愕然，鍾家豪同夏學謙都望向凌御生，夏巧莘嘅視線循住佢兩個望嘅方向移去
凌御生嘅心情有啲複雜，又開心又心痛，夏巧莘一見到凌御生，眼淚瞬間就奪眶而出
凌御生一坐低喺夏巧莘身邊，夏巧莘就頓時伸手緊緊地將凌御生攬實然後哭着
「我就知道你一定會嚟啦！」夏巧莘帶着哭腔，一邊抽泣着說道，「我信你一定會嚟啦！」
「我梗係會嚟救你！」凌御生嘅手摸着夏巧莘嘅秀髮安慰道，「騎士一定會去救公主…」




「我好、好驚…真係、真係以為，見唔到你啦！」夏巧莘緊緊地攬實凌御生講道，心中嘅安全感湧出嚟，「我好掛住你啦！」
「唔怕唔怕，宜家冇事啦，可以番屋企啦～」凌御生溫柔地道，「番屋企啦好唔好？」
「嗯…」夏巧莘抽泣着點點頭
凌御生抱起夏巧莘行出診所上車，三人各自嘅心頭大石終於可以放落嚟
望住夏巧莘又識笑啦，又識喊啦，心中都安心啲

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link