[愛情走糖故]兩個人心底中不為人知嘅秘密,成為兩個人間嘅牽引: 86.心中愉悅

凌御生一臉愕然咁瞪大眼，夏巧莘喺兩秒過後彷彿突然清醒過嚟，瞬間後退
「哎呀？」凌御生勾起唇壞笑起嚟，「睇嚟有人情不自禁咁錫咗落嚟～」
「冇呀！我地成日都錫㗎啦！」夏巧莘一時口快講咗出口，即刻用手掩住小嘴，臉頰都紅起嚟
「哦～所以就咁自然啦～」凌御生示意明白地點點頭
「唔係啦！」夏巧莘一時情急下掐咗凌御生嘅手臂一下
「呀！痛呀！」凌御生即刻一縮
「對唔住呀對唔住呀！你有冇事呀？」夏巧莘記起凌御生受咗傷，手上都貼晒紗布，頓時著緊咁捉住凌御生嘅手臂，「整到你邊度痛啦？」
見到夏巧莘咁緊張嘅反應，凌御生嘅嘴角偷偷揚起
「啱啱整到小小咋，唔係特別痛。」凌御生微笑道，「冇事呀！」
「你睇下你呀…」夏巧莘一隻手搭喺凌御生嘅博頭上，另一隻手放喺佢嘅臉頰上，「上次嘅瘀傷啱啱先好番咋…宜家又傷晒啦…」




夏巧莘一臉心疼着，望到凌御生嘴角、臉頰上面唔係有瘀傷就係有傷口，眼淚就忍唔住湧出嚟
「唔好喊唔好喊～」凌御生見夏巧莘一喊，就手足無措了，「宜家都冇事啦！係咪？」
凌御生都冇諗過，佢對住女仔會有咁溫柔咁慌張嘅一面
「你好似最近次次受傷，同人打架都係因為我啦…」夏巧莘抽抽鼻子，雙眼紅紅的
凌御生無言以對，夏巧莘講嘅又的確係事實，佢引唔可以否認，凌御生只可以安慰着夏巧莘
「真係冇事呀～」凌御生苦笑道
「嗯…」夏巧莘抿着唇點頭
「陣間落去食飯，拎齊嘢。」凌御生轉移話題道
「得個書包咋嘛…」夏巧莘講道
去到6點半嘅時候，兩人先出門口去食飯




「好奇怪呀…」夏巧莘一踏出樓下大堂就講，「你著住便服，但我就著校服…」
「都Okay呀～」凌御生笑一笑，「唔係好奇怪啫～都幾好睇。」
「你話我好睇定你好睇呀？」夏巧莘追問道
「你好睇。」凌御生望向夏巧莘一笑，「最好睇係你。」
「我日日都咁好睇。」夏巧莘甜甜地笑道
沿住斜路行落到去商場，再喺商場搭扶手電梯落去Food court
「你想食咩呀？」凌御生問道
「搵咗位先。」夏巧莘東張西望咁搵空位，喺離佢地不遠嘅地方就有一張枱，一邊坐咗兩個人，兩個人嘅對面有兩個平排嘅空位
夏巧莘行咗過去坐低
「你食咩呀？幫你買埋。」凌御生雙手插喺衫袋入面




「我想食嗰間拉麵，要食叉燒拉麵。」夏巧莘講道，「陣間比番錢你。」
「嗯。」凌御生嗯咗一聲之後就行咗去買飯
夏巧莘耷低頭睇手機，偶爾抬頭望一望凌御生，偶爾會同凌御生嘅視線對上，偶爾會相視而笑，然後又繼續做自己嘅嘢
「你食先啦～」凌御生捧住一份餐過嚟，小心翼翼咁放低喺夏巧莘嘅面嘢
「嗯。」待夏巧莘點頭之後，凌御生就轉身又行出去拎自己嗰份餐
但夏巧莘仍然坐着冇起筷，等埋凌御生先一齊食
轉眼間凌御生又行番嚟，將份餐放喺夏巧莘嗰份嘅隔離
「你唔食嘅？」凌御生望住夏巧莘
「等埋你嘛！」夏巧莘笑一笑然後拎起木筷子，左右一拉，將木筷子啪開
凌御生望住笑而不語，然後拎起木筷子同夏巧莘做同樣嘅動作

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link