[愛情走糖故]兩個人心底中不為人知嘅秘密,成為兩個人間嘅牽引: 85.玩笑中的承諾

夏巧莘簡直就係凌御生啲靈丹妙藥
「我換件衫先，陣間同你去食飯。」凌御生笑一笑，離開咗露台行番入房
凌御生換咗套衫，坐喺床邊，耷低頭
諗起細個嘅時候嘅回憶…
「爸爸，點解有咩事嘅時候，你都會係企喺媽媽前面嘅？」只有6歲嘅凌御生坐喺梳化上面問凌天傲
「因為媽媽係爸爸就算死都想要保護嘅人囉～」凌天傲笑一笑道
「所以要行喺前面？」凌御生不解地側着頭，「我係咪都要行喺前面㗎？」
「哈哈～」凌天傲笑起嚟，「你係爸爸媽媽嘅寶貝，要行最後㗎！」
「咁點解爸爸就要行最前面呀？」凌御生又再問道，「點先叫做死都想要保護嘅人呀？我唔想死喎但係！」
「因為你同媽媽都係爸爸最重要嘅人，所以爸爸要行喺前面，趕走晒啲敵人囉！」凌天傲盡量解釋道，雖然年紀輕輕嘅凌御生都係唔明白，「當你大個咗之後，遇到對你嚟講最重要、最中意嘅人嘅時候，你就會明白咩係就算死都想要保護嘅人㗎啦～」




「佢仲咁細個，邊度明呀？」凌御生嘅媽媽捧住一碟切開咗嘅蘋果行到梳化前
「總之呢，到你大個咗嘅時候就會明㗎啦！」凌天傲伸手摸摸凌御生嘅頭
凌御生握緊拳頭，眼神堅定
「我一定…要好好保護佢。」凌御生喺心中默許
佢宜家終於知道到底咩係「就算死都想要保護嘅人」，凌御生終於明白呢個意思，自從呢個女仔出現，佢就係佢最想要保護嘅人
夏巧莘企喺露台，喺露台嘅右邊有一張用籐編嘅吊椅
夏巧莘盤着腿坐喺吊椅嘅軟墊上，吊椅前後晃着，夏巧莘舒適地背靠抱枕，手又抱一個抱枕
「我同凌御生好似唔再喺曖昧嗰條Line上面…」夏巧莘喺心中講道，自己都意識到佢地兩個之間嘅行為早就唔係曖昧咁簡單
張吊椅慢慢前後搖着，夏巧莘合埋眼，感受風吹過嘅時候嗰種舒適同涼快
過咗一陣，凌御生喺睡房行出嚟，發現唔見咗夏巧莘




「夏巧莘人呢…？」凌御生東張西望，忽然發現露台嘅門仲開住，輕輕一笑就邁步行向露台，探頭出去嗌道，「夏巧莘！」
凌御生望出去，見唔到夏巧莘，視線一移到旁邊嘅吊椅上時，忍唔住一笑
「點解會咁可愛㗎？」凌御生笑着自言自語道，然後拎出手機，偷偷影低夏巧莘舒適咁瞓着嘅睡顏
凌御生懾手懾腳的行到夏巧莘面前單膝跪低，捉住吊椅用力一搖，夏巧莘頓時顫咗一下，嚇了一驚
「醒啦！仲瞓！」凌御生調皮地笑道
「你嚇我！」夏巧莘一手抱住抱枕，另一隻手輕輕打凌御生
「見你瞓得咁舒服，忍唔住要嚇下你。」凌御生講道
「噗…」夏巧莘留意到凌御生係單膝跪喺佢面前，忍唔住一笑，「你單膝跪做咩呀？要求婚呀？」
「你去到30歲都冇人要嘅話，我娶你囉～雖然難啲…」凌御生嘅玩笑下藏着真心
「你娶我？好想娶我咩？」夏巧莘笑道




「娶到個靚老婆唔係男人嘅畢生夢想咩？」凌御生假裝思考中咁微微皺起眉，側着頭
「想娶我咪講囉～但我冇話想嫁你。」夏巧莘甜甜地笑道，心中甜絲絲的
「我話你30歲都冇人要嘅話呀！」凌御生無奈咁講道，「反正你都會有人要。」
「唔知㗎～緣份嘅嘢好難講㗎嘛～」夏巧莘笑一笑，但呢句話入面語帶雙關，一方面係指自己未來嘅緣份，一方面係指自己同凌御生之間嘅緣份
夏巧莘突然彎下腰，嘴唇輕輕碰上凌御生嘅唇

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link