[愛情走糖故]兩個人心底中不為人知嘅秘密,成為兩個人間嘅牽引: 87.楊美娜

今次已經係唔知第幾次兩人一齊食晚飯，兩個人之間早就冇尷尬感同距離感
「今次我請，下次你請番我食飯。」凌御生突然間開口講道，「所以唔洗比番錢我啦～」
夏巧莘諗咗一陣，然後露出淡淡嘅笑容
「好呀～咁我又可以同你一齊食多餐飯啦～」夏巧莘講道
「快啲食啦～」凌御生冇直接回答夏巧莘，只係笑一笑
當夏巧莘低頭食嘢嘅時候，眼尾瞄到凌御生嘅手臂，一望到貼滿紗布嘅手，夏巧莘嘅心臟就緊緊地揪了一下
今日事發突然，夏巧莘都比唔上反應，但凌御生寸步不離夏巧莘嘅身邊，因為要顧住身後嘅自己而唔敢亂郁，離開一步都唔敢
就算係要反擊嘅時候，都因為自己喺度而令佢冇辦法出盡力，令凌御生受傷
一把大刀斬落嚟又點會唔痛？但凌御生為咗安慰自己，點都話唔痛冇事，手都滲晒血出嚟又點會冇事？
「做咩呀？」凌御生望向夏巧莘，佢感覺到夏巧莘望住佢，然後伸手摸一摸夏巧莘嘅頭，「快啲食啦！」




「嗯…」夏巧莘微微點一點頭
喺屋企嘅夏學謙，最近都係心不在焉，明明一早就知道咗真相，但係當聽到媽媽講出成件事嘅來龍去脈，心中就有種不協調感
根據媽媽所講，佢嘅生母就葬喺跑馬地嘅天主教墳場
夏學謙知道之後，喺放學嘅時候去咗一趟，特地買咗一束花過去
到達咗墳場之後，夏學謙喺褲袋中拎出媽媽寫比佢嘅一張紙，紙上面寫咗墓碑大概嘅位置同墓碑嘅編號
夏學謙企喺墳場嘅門口，帶着心中嘅不協調感問着自己：「到底我係為咗咩而嚟呢度…？」
係咪因為好奇？定係因為憤怒？還是係因為其他特別嘅原因？
夏學謙自問，佢冇嬲過生母，因為如果唔係因為佢拋棄咗自己，佢宜家或者唔會有一個咁好嘅屋企…
「既然都嚟咗，就鼓起勇氣行過去…」夏學謙同自己講，呢一刻心中始終有啲緊張，因為從來都冇見過自己嘅親生媽媽楊美娜，估唔到第一次見面係喺呢度
夏學謙打開紙仔，喺入口處望一下大概嘅位置




一個男人喺墳場行出嚟，睇嚟係拜祭完，佢喺右邊行出嚟，行到嚟門口
「唔該借借…」男人細聲咁講咗句
夏學謙向左邊行開咗一步，嗰個男人喺夏學謙嘅身旁經過
夏學謙踏入墳場，經過咗閘外嘅對聯，「今夕吾軀歸故土 他朝君體也相同」，踏上數級樓梯，直望過去係聖彌額爾墳場小堂
再望咗一眼紙仔，行向右邊，到咗嗰一行時，夏學謙停低咗，深呼吸之後行向生母嘅墓碑
當行到去寫住「楊美娜」嘅墓碑嗰陣，夏學謙愕一愕然，又回頭望，望向墳場嘅門口
喺大理石嘅底座上，放咗一束鮮花，睇嚟先係擺咗一陣
夏學謙冇多理，放下鮮花喺嗰束嘅旁邊
喺名字嘅上方，有生母嘅照片，原來生母係一個長得清秀嘅女子，臉上掛上淺淺嘅微笑
第一次見到生母，心中有種難以言喻嘅感覺…




夏學謙低頭微微一笑，心中有種釋然嘅感覺
「媽媽…有好好照顧我，我過得好好…好健康好開心咁成長，亦有努力讀書…」夏學謙有啲尷尬咁講道，但係生母面前，明明冇見過面但都冇太大拘謹，「我有聽媽媽嘅話，冇令佢覺得麻煩。我已經16歲，今日係第一次見你…媽媽病咗所以冇辦法嚟睇你，希望你會保佑媽媽早日康復…」
夏學謙都唔知道要講啲咩先啱，因為始終存在住尷尬感
「今日嚟除咗係想見一見自己親生媽媽係點樣之外…仲係想話你知…」夏學謙停頓咗一下，然後又笑了笑，「我生活得好好，媽媽有做到你想佢做嘅嘢，佢有好好照顧我，當我係親生仔一樣看待，對我嘅愛什至比分比家姐嘅都多啲…你…唔洗擔心…」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link