[愛情走糖故]兩個人心底中不為人知嘅秘密,成為兩個人間嘅牽引: 80.危險前夕

夏巧莘一推開家門，見到入面漆黑一片，同時見到一個人坐咗喺梳化上發呆
「嘩夏學謙，你搞咩呀？」夏巧莘伸手去拍燈制，將鎖匙喺匙孔入面抽番出嚟之後順手咁放喺置物櫃上面嘅玻璃碟中，「想嚇邊個呀？又唔開燈…」
「嗯…」夏學謙嗯咗一聲
夏巧莘覺得夏學謙怪怪的，將鞋除落嚟之後行到夏學謙隔離
「做咩呀？唔舒服呀？」夏巧莘將手放喺夏學謙嘅額頭上，「又冇發燒呀…」
夏學謙撥開夏巧莘嘅手
「做咩呀？」夏巧莘關心道
「冇嘢，你快啲去沖涼啦。」夏學謙企起身，「我番房先。」
「喂夏學謙，你做咩呀？」夏巧莘坐喺梳化上望住夏學謙嘅背影追問道
「咪等你門囉～平時都係咁㗎啦～」夏學謙擰轉頭望夏巧莘，笑一笑，將心中不愉快嘅事都壓到心底




「你係至好講呀…」夏巧莘頓時放心地無奈一笑，「我沖涼先啦，你早啲瞓。」
「嗯。」夏學謙嗯咗一聲之後就行番入房
夏巧莘閂上客廳嘅大燈，然後開咗嘅牆燈之後就入房拎好居家服去沖涼休息
「嘻嘻～原來我對佢嚟講好重要～」夏巧莘高興地喃喃自語道，微微嘟起嘴，「但呢個重要又點同做到你女朋友一樣…」
夏巧莘其實自己都好矛盾，知道雖然幸福需要自己主動去爭取，但係又覺得只要見到對方幸福，默默守護都係好事，唔需要去強求一段關係…
凌御生灘喺床上面，自己竟然會講啲咁肉麻嘅說話，諗起都打冷震
平時嘅佢從來都唔會講啲咁嘅嘢，或者因為飲咗酒，膽大咗，所以先會講得出平日唔會講嘅嘢
「希望佢明白我想講咩啦…」凌御生自己笑一笑
「呯呯…！呯呯…！」
屋企嘅大門突然傳嚟兩次「呯呯」嘅打門聲，凌御生頓時喺床上坐起嚟，行出去客廳




凌御生透過魚眼鏡望出去，望到嘅境象將凌御生嚇咗一跳，瞳孔頓時收縮
佢好快咗就開咗門，門外企咗一個渾身鮮血嘅男人，呢個男人係凌天傲
「老豆，發生咩事呀？」凌御生即刻扶住凌天傲
凌天傲渾身鮮血，本來白色嘅裇衫都滲出血嚟，身上有一道又一道嘅刀傷
「入去先講…」凌天傲扶住凌御生嘅博頭，一拐一拐咁行入屋
「坐低先。」凌御生扶住凌天傲行到去梳化坐低，然後再急步行到門前閂上木門，亮起廳燈，「發生咩事呀？做咩成身都係血咁番嚟？」
凌御生拎住急救箱行到梳化前蹲下來，小心翼翼咁幫凌天傲除咗件裇衫落嚟，拎出消毒藥水幫佢洗傷口
「我都唔知嗰啲係咩人，我一踏出社團嘅時候，突然就有一群人拎住刀衝出嚟就追住我地嚟斬。」凌天傲一邊伸出手比凌御生幫佢洗傷口，一邊解釋道
「係咪最近又發生咗咩事呀？仇家？」凌御生輕皺起眉頭
「冇特別有咩仇家。」凌天傲搖搖頭




「冇嘅話有邊個會特別要嚟斬你？」凌御生有啲疑惑，「阿津佢地唔係應該喺度㗎咩？冇人保護你咩？」
凌御生口中嘅阿津，係凌天傲嘅得力助手，比凌御生大5年
「阿津喺度，但係佢地明顯係針對我嚟打…阿津佢地已經擋咗啲。」凌天傲嚴肅地講道，「生，你以後出門要小心啲，因為仲未知道對方嘅身份。」
「嗯。」凌御生點點頭，幫凌天傲包紮好之後閂上急救箱
「生，你真係要小心，對方嘅目的我地仲未知道。」凌天傲再三提醒，「你同你女朋友都要小心。」
「呢個唔洗你講。」凌御生拎住急救箱企起身，「我當然會盡我所能保護佢。」
呢一刻嘅凌御生只知道，如果有危險，佢一定會奮不顧身去保護嗰個對自己好重要嘅佢

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link