[愛情走糖故]兩個人心底中不為人知嘅秘密,成為兩個人間嘅牽引: 79.想成為令你們的驕傲

當知道咗親生媽媽嘅事之後，夏學謙嘅內心有股想知道更多嘅衝動
到底楊美娜係個點樣嘅人？到底佢係咩樣？性格好唔好？
但係一下子吸收咁龐大嘅訊息量，夏學謙已經負荷唔到咁多，佢宜家想靜靜咁休息一下，消化一下成件事，縱使佢早就知道，媽媽唔係佢嘅親生媽媽，佢只係呢個家嘅養子…
夏學謙嘅心中好感恩，因為媽媽從來冇偏心過，縱使自己只係養子，但都當自己係親生兒子一樣疼愛，比自己嘅愛同家姐嘅愛係平等嘅，什至分比自己嘅愛更多
今日喺離開醫院嘅時候，媽媽捉住佢嘅手，溫柔咁講咗一句：「學謙，你係養子呢個係事實，但同時媽媽當你係親生仔一樣對待都係事實。唔需要心中覺得難受，因為你永遠係呢個家嘅一份子。」
呢句說話直打入夏學謙嘅心房，喺淚水快要決堤嘅時候，佢只係講咗一句：「我知道。」
心中講咗千萬句多謝，講咗無數次佢知道，因為早就從媽媽同爸爸嘅表現中睇得出，由佢嚟到呢個家開始，佢地就當咗佢係親生仔一樣
即使最後爸爸媽媽離咗婚，夏學謙亦心存感恩
細個嘅夏學謙，最怕因為自己係養子而爸爸媽媽唔錫佢，所以做咩都特別比心機，參加比賽要努力攞獎，讀書要考第一名，咩都要做得最好，咁樣先可以令爸爸媽媽唔會唔錫佢
但日子耐咗，夏學謙亦慢慢發現，佢地從來都冇當自己係外人，所以更加要努力成為一個令佢地驕傲嘅兒子，更加要報答佢地嘅養育之恩




「夏學謙，你要做得更好…」夏學謙喺心中對自己講道，同時承諾做得更好
…
夏巧莘同凌御生對視着，夏巧莘喺一時三刻諗唔到講咩好
「你對我嚟講，一直都係咁重要，唔可以失去嘅存在…」凌御生繼續捧住夏巧莘嘅臉頰講道，將額頭貼喺夏巧莘嘅額頭上，柔聲問道，「明白嗎？」
「明--」沒等夏巧莘嘅回答，凌御生直接吻下去，堵住夏巧莘嘅唇，夏巧莘輕輕閉起眼，用心去感受着呢個甜蜜嘅吻
良久，凌御生嘅唇先慢慢離開夏巧莘嘅唇，微微勾起嘴角輕輕一笑
「明白嗎？」凌御生再次柔聲問道
「明--」今次同啱啱一樣，夏巧莘一想答，凌御生就用吻嚟堵住夏巧莘嘅唇
夏巧莘嘅雙手輕輕扶喺凌御生嘅腰間，輕微用力捉住凌御生嘅衫
凌御生再次鬆開咗夏巧莘，好讓佢喘一下氣，呼呼一下




「明白嗎？」凌御生柔聲地問第三次
夏巧莘輕輕咬下唇，諗緊要點好，因為佢覺得凌御生一定又會錫佢，雖然佢都幾享受呢個男仔嘅吻，喺溫柔之中夾雜咗少許霸道
「嗯…」夏巧莘小心翼翼地點頭，「我明--」
果然不出夏巧莘所料，佢一想答明白嘅時候，凌御生就會吻上佢嘅唇
「你呀…！唔係問我明唔明白咩？」夏巧莘一臉羞澀地望住凌御生，「問完又唔比人答…」
「你個心明白咪得。」凌御生像是得逞一樣笑起嚟
「凌御生你真係愈嚟愈過份呀…！」夏巧莘咬着唇，羞澀極了地講道
凌御生望住夏巧莘呢個害羞嘅表情，微微一微，然後喺微微低頭喺夏巧莘嘅臉頰上錫咗一啖
「我番去啦，你番去都要小心啲。」凌御生不忘提醒夏巧莘，「番到去記得whatsapp我。」
夏巧莘點點頭，凌御生轉身微微耷低頭行入大廈大堂




「呀～講咗啲肉麻嘢…」凌御生細聲地喃喃自語道，臉頰同耳朵都泛紅起嚟，一臉尷尬地撥撥頭髮行入大堂
夏巧莘轉身離開番屋企，指尖輕輕掂住嘴唇
「咁樣算唔算係間接講咗佢嘅心意比我知呢…？」夏巧莘一邊行，一邊甜笑着

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link