[愛情走糖故]兩個人心底中不為人知嘅秘密,成為兩個人間嘅牽引: 78.他的過去

「我知道…我唔係你親生。」夏學謙講完之後，微微抬頭望向媽媽，「我早就知道啦…」
「仲以為呢個秘密可以守一世添…」媽媽低頭一笑，慨嘆道，「你有冇唔開心呀？」
「一開始好驚，好驚你地會唔錫我，但後來你同爸爸對我好好，真係當正我親生仔一樣…」夏學謙微微耷低頭露出淺淺嘅笑容，「所以…冇唔開心…」
「咁多年嚟，你有冇好奇過邊個係你媽媽呀？」媽媽臉上嘅笑容變成咗歉疚嘅笑容
「有呀，但係…」夏學謙欲言又止，有啲懊惱咁撥一撥頭髮，「唔知呀…我只係覺得由你揀咗養我開始，我媽媽就只有你一個。」
「學謙…你想唔想知道你親生媽媽係邊個？」媽媽收起咗笑容，只剩下歉疚
夏學謙冇出聲，喺心中猶疑緊要點樣回答
始終係親生媽媽，夏學謙點都會有少少好奇，但係畢竟宜家呢個媽媽先係養咗自己多年嘅媽媽…
「你媽媽叫楊美娜，佢唔係特登要掉低你唔要你，只係…」媽媽停頓咗一下，夏學謙抬起頭望住佢，媽媽深呼吸，然後再次緩緩開口道，「只係當年社會思想封閉，美娜佢接受唔到自己未婚懷孕，但當時嘅男朋友偏偏唔承認自己係經手人走咗佬…而且最令美娜難受嘅，係身邊嘅人對佢嘅指指點點同閒言閒語。」
「咁點解唔落咗我…生咗我出嚟但又掉低我？」夏學謙不解，唔明白點解既然親生媽媽接受唔到但又要生自己出嚟，生完之後又唔要自己，「佢亦冇睇過我，我嘅成長中冇呢個人嘅存在…」




「學謙，唔係咁樣㗎，唔係美娜唔想要你，而係喺你出世之後嘅一個月，美娜喺佢住嗰幢大廈嘅天台跳咗落嚟…」媽媽緊緊地捉住夏學謙嘅手解釋道，唔希望夏學謙誤會，「我地當時嘅社會思想未係好似宜家咁開放，未婚懷孕會受盡他人白眼，係件傷風敗俗嘅事嚟…你媽媽佢受盡白眼，屋企都趕咗佢出嚟，仲患上咗嚴重嘅抑鬱症，但係佢揀咗生你出嚟，可惜最後都係受唔住外人嘅閒言閒語…」
呢一刻喺夏學謙心中，冒出少許嘅怒火
佢唔明白，點解係嘅親生媽媽可以掉低佢，聽到親生媽媽了結咗自己嘅生命嗰陣，既憤怒又痛心
明明冇相處過，但係卻有心痛嘅感覺
「嗰陣巧莘已經兩歲，突然收到美娜嘅死訊我又何嘗唔係大受打擊？」媽媽眼泛淚光，夏學謙頓時拎紙巾出嚟遞比媽媽，媽媽拭去眼淚，伸手放喺夏學謙嘅臉頰上，「美娜佢喺過身前寫咗封信比我，佢話…佢個寶貝仔以為就交比我照顧，希望我會好好照顧佢…」
當日睇到嗰封信嗰陣嘅感受，去到今日仍然瀝瀝在目，嗰種傷感去到宜家都仲記得好清楚
「學謙，你要記住，你親生媽媽美娜唔係唔要你，佢知道佢冇能力照顧你，佢去到了結嘅嗰一刻，心中仍然有你，只係佢要用盡力去保護你，唔可以比你喺閒言閒語嘅環境下成長。」媽媽更用力咁握住夏學謙嘅手，「學謙，唔好覺得全部都係佢嘅錯…佢有嚴重嘅抑鬱症已經好難受，要受住外人嘅白眼同閒言閒語真係唔易。」
「嗯…」夏學謙點點頭，然後伸手攬住媽媽，呢一刻佢就好似變番一個小朋友一樣躲喺媽媽嘅懷中
「佢將你交託比我，我自然就唔會辜負佢，而且由我抱你番屋企嗰一刻開始，你就係我個仔。」媽媽忍住淚水講道，「你有咁樣嘅成就，見到你健康長大係美娜嘅心願嚟，美娜在天之靈，都會同媽媽一樣為你驕傲…」
媽媽微微抬頭，將淚水收回，然後露出溫柔嘅笑容拍一拍夏學謙嘅背




「嗰陣美娜知道有咗之後好慌張，男朋友離佢而去，屋企人將佢趕出家門，美娜嚟咗搵我，我收留咗佢…」媽媽開始回想，夏學謙嘅眼眶開始紅起嚟，「本來以為有我地成班朋友喺佢身邊，佢就唔會有事，但最後都係患上抑鬱症…我地曾經同佢講話落咗個BB佢啦，你唔Okay㗎咁樣…但係…」媽媽定睛望住夏學謙，緊緊地握住佢嘅手，「美娜同我地講唔得，一定要生出嚟…佢話佢一定會冇事…但結果…我地每一個人都冇諗過會係咁樣…」
喺夏學謙心底中，呢個係最大嘅心結
曾經以為，親生媽媽一定係一啲都唔愛佢所以先會唔要佢
但係冇諗過，原來親生媽媽美娜喺懷胎十月嘅過程中係咁痛苦，但係最後仍然生咗佢出嚟…
夏學謙睜開眼，佢仍然坐喺漆黑一片嘅屋企中，坐喺梳化上面望住天花板

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link