[愛情走糖故]兩個人心底中不為人知嘅秘密,成為兩個人間嘅牽引: 77.品學兼優的他

「做咩呀？」夏巧莘微微側頭問道，隨即而來嘅係心跳加速同緊張感
凌御生輕輕推開咗夏巧莘挽住自己手臂嘅手，夏巧莘頓時顯得有啲不知所措，冇諗過佢會推開自己嘅手
凌御生成個人轉身擰去面對住夏巧莘
「果然佢唔中意我…」正當夏巧莘喺心入獨自失落難受，眼眶泛紅嘅時候，凌御生雙手捧住夏巧莘嘅臉頰
本來已經喺眼眶打轉嘅淚光突然又收番入去，一臉訝異咁望住凌御生
「夏巧莘…」凌御生再次輕喚夏巧莘嘅名字，然後深呼吸，一臉認真咁凝視住佢
夏巧莘不禁屏住呼吸，心中既擔心又期待
「你對我嚟講好重要，係我唔可以失去嘅人…」凌御生嘅臉頰因為酒氣未完全散去而仲有少許紅霞，感覺上魅力更強了，「如果失去咗你嘅話，或者我會崩潰…」
夏巧莘錯愕咁望住凌御生，手輕輕捉住佢嘅手腕
呢啲情話從凌御生口中講出嚟，配合四周嘅環境氣氛，令人倍加心動




「即係點呀…」夏巧莘起咗貪念，想要知道更多
女仔唔係都係咁樣咩？喺愛情中會有得一想二嘅心
「就係你對我嚟講好重要嘅意思。」逐漸酒醒嘅凌御生先唔會跌入夏巧莘故意設置嘅圈套
夏巧莘直盯着凌御生望，心臟嘅跳動又開始
「對每個人嚟講，總有一啲好重要嘅嘢，對我嚟講，你就係最重要嘅嘢。」凌御生雖然都覺得都有啲難為情
…
屋企冇開燈，全屋漆黑一片，夏學謙獨自一人坐喺梳化上望住天花，表情極為沉重
輕輕閉起雙眼，用力將今日嘅事收到心底，再上鎖鎖住，呢件事對佢嚟講，係一個秘密，不為人知嘅心事…
下午 16：52
「媽，今日見點呀？」夏學謙坐喺床邊嘅膠櫈上，雙手放鬆咁放喺雙腿之間




「好好多啦。」媽媽溫柔地笑道，「你日日都嚟我，你唔忙咩？啱啱上到高中應該好忙先係㗎。」
「我應付得嚟。」夏學謙嘅微笑永遠都係如此不明顯
「我地學謙永遠都係咁叻仔咁有本事。」媽媽露出安慰嘅笑容，但夏學謙卻滿懷心事，媽媽一眼就將夏學謙嘅心情睇穿，「做咩呀？有咩唔如意嘅事？」
「媽媽你要快啲好番…」夏學謙輕輕捉住媽媽嘅手腕，「咁樣就可以快啲番屋企同我地一齊…」
媽媽伸手輕輕撫摸夏學軒嘅頭，微笑起嚟
「媽媽努力咁同病魔博鬥緊㗎啦～放心啦，一定會好番。」媽媽柔聲道，「你仲有心事？媽媽睇得出。」
「媽…多謝你養咗我咁多年…」夏學謙罕有地露出笑容，縱使只係一個淡淡嘅笑容，「辛苦你啦…」
「唔辛苦，你大個仔啦都，一早就成熟啦…媽媽冇覺得辛苦啲咩…」媽媽微笑道
望住眼前呢個得16歲嘅男仔，但感覺上就好似大人一樣成熟
讀書成績好，各方面都出式，咁樣一個文武雙全嘅兒子，係媽媽心中嘅驕傲




「你由細到大都好乖，冇咩辛苦…你係媽媽心中嘅驕傲呀～」媽媽講道
夏學謙面色一沉，開口道：「我一直都係你嘅驕傲？」
「嗯！」媽媽點點頭，「做咩呀？」
「冇…我由細到大最想嘅就係成為你嘅驕傲…最怕你唔錫我，淨係錫家姐一個。」夏學謙苦笑道
「唔會，媽媽錫巧莘之餘都錫你，你地都係我嘅心頭肉。」媽媽不禁有啲疑惑，「點解你會咁諗㗎？」
「因為…我知道咗嗰件事嘅真相…喺細個嗰陣喺你同爸爸嘅房門口聽到…」夏學謙臉色沉重
媽媽聽到呢個開頭，不禁一顫

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link