[愛情走糖故]兩個人心底中不為人知嘅秘密,成為兩個人間嘅牽引: 60.否認了

夏巧莘郁咗兩郁，踢起被子，緩緩睜開眼，微微抬起頭…映入眼簾嘅係俊俏嘅臉龐
「點解瞓着咗都咁好睇…？」夏巧莘調皮咁伸手戳凌御生嘅臉頰
凌御生嘅眼皮動了動，夏巧莘即刻耷低頭合埋眼扮瞓
「唔洗扮啦…知你醒咗啦…」凌御生嘅眼睛眯起，微微睜開
夏巧莘知道被識破，慢慢抬起頭望凌御生笑咗一笑
「我呢…平時飲咗酒醉咗都會唔記得前一晚嘅嘢，但係呢…」夏巧莘講嘅時候，凌御生嘅眼神開始避開夏巧莘，心中有少許緊張，「我記得琴晚有人話佢都中意我…係咪你呀？」
夏巧莘雙眼閃住光咁望住凌御生，但凌御生竟然一時間唔知點答好
「你係咪中意我啫？」夏巧莘今次直接投球問道
凌御生猶疑咗一陣答唔答好，但最後都係講咗句：「你記錯啦…」
凌御生喺「承認」同「否認」之間猶疑，但佢最後揀咗否認




「一定係你飲得太醉啦～」凌御生掛起溫柔嘅笑容喺臉上，然後摸一摸夏巧莘個頭
「係咩…」夏巧莘側着頭，苦惱咁沉思着
喺耷低頭嘅時候忽然留意到自己身上著住嗰件衫唔係自己嘅衫嚟
「件衫…」夏巧莘一臉疑惑咁望住自己件衫
「我㗎，琴晚比你換嚟著住瞓。」凌御生撥一撥頭髮，然後又瞓番低喺床上面
「吓！？咁你咪…！」夏巧莘即刻雙手交叉著放喺胸前，臉頰都開始滾燙起嚟
「我咩都冇睇到囉…」凌御生反咗一個大大嘅白眼，「你琴晚行咗出我房換衫㗎…」
「咁、咁我啲衫呢？」夏巧莘問道
「喺衣帽架上面囉…」凌御生指住門口嘅衣帽架，「我仲好眼瞓呀…宜家先9點幾咋…」
凌御生側住身，一隻手放喺枕頭下，一隻手搭喺被上被，然後喺夏巧莘身後嘅位置指咗兩下，夏巧莘自然咁就乖乖蓋番被瞓低




望住眼前嘅男生再次合埋眼翻瞓，喺夏巧莘嘅心中有種想錫佢嘅衝動
夏巧莘努力咁回想起琴晚嘅情境，佢記得凌御生真係有講過話佢都中意自己，但點解到咗今日卻唔肯承認？
到底係佢真係唔中意自己，定係佢中意只係唔想承認？唔想承認嘅原因又係咩…？
心中開始感到有少許不安，會唔會係因為其實凌御生只係玩弄緊自己對佢嘅感情，自己都只不過係凌御生一時之間覺得有趣嘅對象？
會唔會係凌御生刻意要令自己中意咗佢之後，然後就同自己講佢唔中意自己，只係挽挽下？
會唔會有朝一日，凌御生突然間開始疏遠自己，因為對自己呢個「玩物」已經感到厭倦？
但再多嘅不安都好，呢一刻嘅夏巧莘只係知道，可以咁樣留喺佢身邊其實已經好幸福，至少可以同自己中意嘅人咁近距離咁一齊
凌御生已經知道咗夏巧莘中意佢，由琴晚夏巧莘講咗自己嘅心意嗰一刻開始，兩人之間嘅關係喺表面上就已經唔平等…
「快啲瞓多陣啦…」凌御生就好似發開口夢一樣講道，伸手一把就將夏巧莘攬到自己懷中
夏巧莘靜靜地被攬住，小心臟早就快速跳動，差啲以為心臟要飛出嚟




「如果我係你女朋友就好啦…」夏巧莘喺心中訴說道，擠出一點點笑容
夏巧莘嘅額頭靠喺凌御生嘅胸膛上，微微曲起腳，再次合起雙眼
「對唔住，我宜家真係冇辦法有勇氣咁同你一齊…」凌御生將夏巧莘攬得更實，悄悄地喺心中道歉，「但你嘅心意我已經知道…」
兩個人喺涼浸浸嘅睡房中再次入睡
凌御生嘅溫柔體貼、寵溺同心動，都只會比呢個被佢緊緊攬住嘅女仔，將一切美好嘅事物都留比呢個女仔
你覺得呢個女仔對佢有幾重要？

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link