[愛情走糖故]兩個人心底中不為人知嘅秘密,成為兩個人間嘅牽引: 61.不為人知的甜蜜

當兩個人再醒過嚟嘅時候，已經係晏就12點17分
夏巧莘揉揉眼，慢慢用手撐住坐起身
凌御生懶洋洋咁瞓喺床上伸咗個懶腰，用盡力氣伸展一下四肢
「咁就喺你屋企瞓咗晚啦又…」夏巧莘回頭望向仍然瞓喺床上嘅凌御生
「嗯…冇所謂啦…」凌御生完全冇起身嘅意思
「張床軟綿綿好舒服…」夏巧莘趴喺床上，睇嚟佢好中意呢張床
「今晚再喺度瞓多晚囉～」凌御生開玩笑講道，「反正張床咁大張，我一個人都瞓唔晒。」
「你就想呀！」夏巧莘輕輕打喺凌御生嘅手臂上，「我琴晚已經冇番去瞓啦…」
「咕～」突然傳嚟一聲，凌御生同夏巧莘朝住聲音來源望去
夏巧莘頓時掩住肚子，鼓起兩泡腮




「肚餓…」夏巧莘細聲講道
「你想食咩呀？同你去食埋嘢先送你番屋企。」凌御生終於捨得起身
「想食茶餐廳…」夏巧莘彎着腰講道
「嗯，好呀～」凌御生落咗床，一臉寵溺地伸手摸摸夏巧莘嘅頭，「我去刷牙洗面先，順便幫你開支牙刷同洗面巾。」
「嗯。」夏巧莘望住凌御生行出睡房
夏巧莘嘅眼尾瞄到放喺床頭嘅Chip公仔，不自覺的甜絲絲咁笑起嚟
「佢放咗喺呢度呀～」夏巧莘心中覺得甜到膩了
望到Chip公仔，就諗起喺迪士尼嗰日遇到嗰個外國攝影師，佢影咗佢地兩個一張相，話會send番過嚟比佢
「唔知嗰個外國攝影師send咗張相過嚟未呢～」夏巧莘即刻就轉身拎起放喺另一邊床頭櫃上嘅手機，「check下email先！」
夏巧莘講完就即刻開email check一下，喺mailbox載入中嘅時候，夏巧莘個心已經噗噗、噗噗咁快速跳動緊




「有呀！」夏巧莘見到有一個新嘅email，寄件人就係嗰個攝影師send過嚟，夏巧莘見到嘅時候頓時欣喜若狂
一打開就見到攝影師留低咗一句說話：「Hope that you will always sweet like this, and hope you will like it.」
夏巧莘打開咗張相睇，豈料令佢驚訝得口都合唔埋
「好靚呀…！」夏巧莘不禁概嘆道
喺漆黑嘅晚上，橙黃色嘅光線來自後面正旋轉中嘅旋轉木馬，但旋轉木馬嘅殘影卻令背景有種朦朧美
因為後面嘅強光，令企喺前面嘅兩人就好似被人用燈黃色嘅光線勾劃咗出嚟，凌御生微微耷低頭望住夏巧莘，雙手輕扶住夏巧莘嘅頭箍，嗰陣剛好係凌御生幫夏巧莘重新戴番好個頭箍；夏巧莘微微抬高頭望住凌御生，一副對呢個男仔傾心愛慕嘅模樣，左手抬高搭咗喺凌御生嘅手上面，佢嘅指尖碰到佢嘅指尖
兩個人之間嘅甜蜜互動剛好比攝影師捕捉到，亦因為攝影師捕捉到呢一個瞬間，令兩個人又再有新嘅回憶被定格
夏巧莘將呢張相下載咗落嚟，然後再send比凌御生
「去刷牙啦夏巧莘！」
呢個時候凌御生剛好番嚟，夏巧莘將手機放喺床上然後落床去廁所梳洗一下




凌御生坐低喺床邊睇手機，見到夏巧莘啱啱send過嚟嘅相，都忍唔住嘴角上揚
「原來我地都幾襯…」凌御生帶着滿意嘅聲線細聲講道，「望落都唔差…」
夏巧莘刷完牙，洗完面就行番入凌御生間房，然後微微踮起腳尖，將掛喺衣帽架上嘅衫褲拎落嚟行番去廁所換衫
喺夏巧莘再次離開睡房之後，凌御生隨便拎咗件衫換上，著咗件白色T-shirt喺入面，外面著咗件藍白色嘅裇衫，下身著咗條黑色短褲
凌御生行到衣帽架前，將夏巧莘個小布袋拎咗落嚟，然後行咗出廳坐喺梳化上面等夏巧莘
手機突然間響起嚟，凌御生望住手機螢幕，諗起琴晚冇聽到嘅電話，然後帶住一點抱歉嘅心接聽
「喂！」
「死仔，難怪琴晚唔聽我電話啦～陪晒女咁…之前又話冇嘢嘅？」對面傳嚟鍾家豪嘅質問，「去晒迪士尼放晒閃咁！」
「我琴晚唔係去迪士尼，但做緊重要嘢咪冇聽。」凌御生無奈一笑
「你冇人性啦係咪呀…」鍾家豪嘆咗一口氣
「你一大清早打嚟，就係要質問我呀？」凌御生問道
「其一啦！其二係想問你嚟緊夾band嗰度點。」鍾家豪收起咗玩意，認真咁問
廁所門打開咗，夏巧莘換好衫喺廁所行出嚟
「遲啲再同你講，有嘢做。」凌御生望住夏巧莘笑咗一笑
「同邊個傾電話呀？」





IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link