[愛情走糖故]兩個人心底中不為人知嘅秘密,成為兩個人間嘅牽引: 45.重要的約會前夕（下）

「家姐，你最近唔洗番工咩？」夏學謙喺房行出嚟
「唔洗呀，最近想休息下…」夏巧莘灘喺床上又拎起手機，「所以唔番住啦～」
夏巧莘喺床上面攬住個攬枕轉嚟轉去，心中好想快啲到星期四
「約會約會～」夏巧莘輕快咁講道，「嘻嘻…第一次約會～」
夏巧莘對於第一次嘅約會好期待，心中祈求一切都要美好，希望星期四係晴天，唔好落雨；希望星期四係一個好日子，一切皆好；希望星期四可以同凌御生一齊留低個好回憶
另一邊廂，凌御生喺屋企已經諗好咗要著咩衫，並且已經將套衫用衣架掛咗喺門後面嘅掛勾上，自己正一臉悠閒咁坐喺書枱前㩒手機
一條深藍色嘅短褲，上身配白色衫外面再加件淺藍色裇衫當外套
「唔知夏巧莘會唔會已經諗緊要著咩衫呢…」凌御生心諗，「定係得我先咁緊張…」
兩個人不約而同咁諗到同一樣嘢，就係對方會唔會都好似自己咁已經襯定衫，同時又一齊擔心會唔會得自己先係咁樣，但佢地都唔知道，其實對方同自己嘅想法一樣
…




夏巧莘如常咁走到巴士上層，坐喺窗邊嘅位置，耳朵戴着耳機聽歌，頭靠住玻璃小睡
凌御生喺巴士站等車，巴士嚟到之後，凌御生抬頭望去上層，見到一個熟悉不過嘅身影正靠喺玻璃窗上小睡
凌御生行到上層，一如既往咁坐到夏巧莘身邊
「早晨…」夏巧莘嘅雙眼微微睜開成一直線，然後又合番埋眼
凌御生望住夏巧莘嘅樣子，微微揚起嘴角笑咗笑，咩都冇講就耷低頭睇手機
想小睡片刻嘅夏巧莘，根本就瞓唔到
由凌御生一坐低咗嗰刻起，個心就跳個不停，咩睡意都已經冇晒，縱使雙眼仍然自動合起，但係腦袋卻清醒得很
「原來幸福係咁樣㗎…」夏巧莘嘅嘴角悄悄揚起
由細到大都覺得「幸福」呢兩個字好難以接近，但呢一刻忽然發現，原來幸福好簡單，唔係想象之中咁困難…
原來就算冇接觸，只係喺隔離都好，心中嘅幸福信號都會亮起嚟…雖然總會想設法有多啲嘅接觸，但係即使係維持現狀都足夠




坐喺佢隔離，就想盡量掩飾自己嘅心動，要避開明顯嘅不自然
暗戀一個人，其實好美好…偷偷注視着、默默喺心中祈求佢都一樣中意自己、每一次嘅心動都格外享受…
「落車啦。」凌御生眼見差唔多到站便將手機塞入褲袋，然後捉住夏巧莘嘅博頭晃兩下
「嗯…」夏巧莘假裝出啱啱瞓醒嗰種朦朧聲線，掩飾自己根本就冇瞓過
凌御生行喺前面，夏巧莘行喺後面，兩人同其他同樣喺呢個站落車嘅同學一樣企喺樓梯等巴士埋站
「嘻嘻…你睇下～」夏巧莘笑住咁拍凌御生博頭，「我宜家企高咗一級就同你差唔多高啦～」
「睇到你突然高咗。」凌御生無奈咁講
「你行喺我前面就矮過我啦～」夏巧莘調皮咁笑道
「我企你前面係因為怕你企唔穩跌嗰陣我扶得住你…」凌御生平靜咁講道
但突如其來嘅一句，擊中咗夏巧莘嘅本來平靜咗嘅內心，心…再次強烈咁跳動起嚟




「你真係好溫柔…」夏巧莘甜甜地笑着道
「唔係囉…」凌御生聽到之後撇開臉，因為感覺到臉頰突然泛紅，好細聲咁講咗句：「我淨係對你先溫柔…」
「你啱啱講咩呀？」夏巧莘側着頭望凌御生問道
「冇講嘢…」凌御生回答，但冇望住夏巧莘講
「聽日我地一早去挽好唔好呀？」夏巧莘問道
「可以呀，你想約幾點？」凌御生點頭
「9點9！」夏巧莘一臉興奮
「9點9…好呀。」凌御生諗咗一諗點點頭，「迪士尼唔係開10半咩？」
「係呀～」夏巧莘自然咁捉住凌御生嘅手臂，「一朝早冇咁多人呀～聽日仲要係平日！」
「咁咪好，你有冇卡？」凌御生問道
「咩卡呀？」夏巧莘側側頭，「全年證？我有呀～你有冇呀～」
「有。」凌御生無奈一笑點點頭，「之前有段時間同鍾家豪去挽，申請咗所以。」
「你嗰張係咩？」夏巧莘問道，「我嗰張係金卡。」
凌御生喺左邊褲袋拎咗銀包出嚟望一望
「金。」凌御生將銀包遞比夏巧莘望咗眼




「咁我地都可以免費入園！」夏巧莘再驚訝，「好耶～快啲到聽日啦～好想快啲去挽～」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link