[愛情走糖故]兩個人心底中不為人知嘅秘密,成為兩個人間嘅牽引: 44.重要的約會前夕（上）

「到底我有幾中意夏巧莘…」凌御生托住頭沉思，喺心中問道，「但其實呢個感覺係最近先有…好感？好感再多啲啦應該係…」
凌御生喺心中默默計算着，都底佔咗幾多個percentage
「喂！」鍾家豪一手拍落凌御生嘅背上
「點呀…」凌御生因為思路被打斷所以一臉不悅
「星期四放假，練band？」鍾家豪約嘅日子，剛好係凌御生同夏巧莘有約嘅日子
「唔得閒星期四。」凌御生拒絕道
「下？你都會唔得閒㗎咩？」鍾家豪笑道
「約咗人呀…」凌御生細聲道
「哦～」鍾家豪頓時露出意味深長嘅笑容，「約咗校花呀？」
凌御生冇出聲，默認咗鍾家豪講嘅嘢




「好啦好啦～」鍾家豪點點頭，比咗個okay手勢，「我明嘅～我唔會阻你搵女嘅～」
凌御生無奈一笑，同鍾家豪碰一碰拳
「咁樣算唔算係…我同夏巧莘第一次約會呢…？」凌御生心諗道，感覺到心臟噗噗、噗噗咁用力跳動，「第一次同女仔出街，著咩衫先叫好呢…？」
喺呢日完結，夏巧莘番到屋企嗰陣，第一件事係打開衣櫃望下有咩衫
「著呢件好唔好呢？」夏巧莘喺衣櫃中拎咗件白色T-shirt同黑色短裙企喺全身鏡前，「但著裙嘅話，挽機動遊戲唔方便喎…」
夏巧莘將套衫塞番入衣櫃中，然後又拎另一套衫出嚟，今次拎咗件粉紅色嘅露博衫，同一條白色短褲
「呢套好唔好呢？」夏巧莘再次企到喺全身鏡前左照照右照照，「但係著白色褲會唔會唔太好呢？」
「我番嚟啦…」呢個時候夏學謙番到嚟屋企
夏學謙拎住書包行番入房嗰陣經過夏巧莘嘅睡房，見到夏巧莘幾衣櫃入面嘅衫都拎晒出嚟左揀右揀
夏學謙企喺房門口，望緊夏巧莘喺度做咩




夏巧莘完全冇留意到夏學謙嘅存在，仍然自顧自的揀衫
「著呢件好唔好呢…定呢件？」夏巧莘一臉迷惘
「你做緊咩呢？」夏學謙行入去夏巧莘房入面，望住放喺床上嘅小山丘
「你番咗嚟啦？」夏巧莘回頭望一望夏學謙，然後又繼續拎衫襯衫，「我咪就係喺度襯緊衫囉。」
「突然間喺屋企襯咩衫…」夏學謙靠喺門邊
「我星期四約咗人出去，咁咪諗住襯定衫囉～」夏巧莘笑一笑，然後行到床邊放低手上嘅衫，拎起另一件
「今日先星期二咋喎…」夏學謙感到無奈同時又有啲疑惑，想問一句「約咗邊個出去咁重要？」，但係從夏巧莘嘅著緊程度嚟睇，夏巧莘應該係約咗凌御生，夏學謙將想問嘅嘢吞番落去，「你星期四去邊呀？」
「迪士尼～」夏巧莘好似小朋友咁興奮講道
「著短褲啦，方便啲。」夏學謙指住放喺床上面嘅深藍色高腰短褲
「呢條？」夏巧莘放低手上兩個衣架，行到床緊拎起夏學謙指住嘅短褲




「嗯。」夏學謙嗯咗一聲，然後行到床邊，喺小山丘中搵衫，「呃…上身著…」
夏學謙喺衫同衫之間搵到件上面用潦草寫住「Love Yourself·Love The Others」嘅白色T-shirt
「Okay～」夏巧莘滿意咁笑道，「就咁啦～」
夏巧莘將啲衫掛番入衣櫃同摺番好，夏學謙望住夏巧莘一臉高興，無奈咁笑咗笑，行出夏巧莘嘅睡房番自己房
「真係邊個都阻唔到你兩個…」夏學謙喺心中講道
雖然對凌御生嘅厭惡度冇改變，但係因為夏巧莘中意，咁冇辦法啦
夏巧莘拎住手機灘落床，側身瞓喺床上
「好期待添～」夏巧莘望住手機甜甜一笑，「快啲到星期四啦～」
夏巧莘背脊向天咁趴喺床，輕輕踢腿，拎住手機上網搵約會攻略
「嘻嘻…等我睇下先～」夏巧莘嘅心情喜滋滋的
夏巧莘睇咗兩睇，然後鎖上手機螢幕，將手機放喺枕頭旁邊，一個翻身就攬住咗喺放喺牆邊嘅攬枕
「凌御生會唔會好似我一樣，咁快就諗定著咩衫呢…」夏巧莘喃喃自語道，「定係其實得我先咁緊張…」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link