[愛情走糖故]兩個人心底中不為人知嘅秘密,成為兩個人間嘅牽引: 37.我想證明

夏巧莘一直耷低頭冇出聲，喺心入面掙扎緊問唔問出口，但掙扎咗一陣之後都係決定唔問
「不過我覺得女仔識唔識煮飯都唔緊要。」凌御生一開口，就講咗夏巧莘想知嘅嘢，頓時就引起佢嘅興趣，「溫柔顧家咪得囉，不過…」
凌御生突然間停頓，令夏巧莘嘅好奇心更強，就算耷低頭食飯都豎起耳仔聽清楚
「最重要都係自己中意啫～」凌御生講道
「嗯…」夏巧莘點點頭，然後抬頭問道，「你之前有冇拍過拖？」
「之前？」凌御生有啲愕然夏巧莘會咁樣問，「冇呀，冇拍過拖。」
「咁有冇追過女仔？」夏巧莘再問
「冇。」凌御生好平靜咁答
「咁多年都冇追過女仔？」夏巧莘問嘅時候有啲訝異，佢竟然一個女仔都冇追過，但心中有啲開心
「有幾出奇啫，冇值得中意嘅人咪冇追囉…」凌御生無奈咁講




「冇值得中意嘅人…咁我會唔會係值得你中意嘅人呀？」夏巧莘半好奇半開玩笑咁問
「會，如果我中意你嘅話，你應該都係個值得我中意嘅人。」凌御生表面上爽快咁回答，但個心早就跳得快到要飛出嚟一樣
「點解呀？」夏巧莘甜甜咁笑然後耷低頭問道，「喺你身邊冇同樣值得你中意嘅女仔咩？」
「我身邊只有你一個女仔。」凌御生若無其事咁講出嚟，「我…好抗拒主動接近我嘅女仔。」
「咁點解你唔抗拒我？我都好主動接近你。」夏巧莘再追問
凌御生嘅每一個答覆，都挑起夏巧莘嘅好奇心，令佢不斷想知更多更多
「唔知，或者係你本來就有嘅魅力，令身邊嘅人都冇辦法抗拒你啦～」凌御生笑一笑
夏巧莘想知道更多，想證明自己喺凌御生眼中係獨特嘅存在，自己比起想象中…更在意凌御生對自己嘅睇法
「我覺得你同其他人好唔同…」凌御生將空碗放喺枱上，然後淨係夾餸食
「唔同？」夏巧莘瞬間清醒




「我講唔出有咩唔同，總之就係同其他人唔一樣。」凌御生微微一笑
其實凌御生知道夏巧莘同其他人嘅不同之處喺邊，只係唔想講出口，唔想話比夏巧莘知係喺自己對佢嘅感覺上唔同，唔想夏巧莘知道自己對佢有好感
夏巧莘點點頭，默默低頭食飯，掩蓋心中嘅失望
「你同其他人唔同，對我嚟講…」凌御生見到夏巧莘嘅表情，又開始唔忍心令佢失望
講完之後為咗掩蓋自己嘅難為情，默默拎住飯碗企起身行去廚房
夏巧莘嘅心情好似過山車咁，沉咗一下又升番上去，忍唔住笑意
「你都係唔一樣，對我嚟講。」夏巧莘回應佢，然後拎住空嘅碟行去廚房，企喺凌御生旁邊抬頭望佢
兩個人對望着，相視而笑
兩個人對望着，慢慢收起咗笑容
兩個人對望着，慢慢咁靠近對方




兩個人合上眼，嘴唇碰到對方嘅唇
兩人之間再次瀰漫着曖昧嘅空氣，四周彷彿都為佢地飄起粉色嘅泡泡，既是有情又無情
明明有好感但卻唔承認，只敢從言語之間試探般透露出自己嘅心聲，怕對方睇穿又怕對方睇唔穿
只可以借住兩個人之間嘅曖昧關係偷偷「發展」，有名無實嘅兩人，踏多一步冇勇氣，但係冇辦法番轉頭將感覺撤回
雙唇悄悄交搭比激烈嘅纏綿更加甜蜜，心跳加速同時偷偷取出一點甜，好似蜜糖一樣甜
悄悄交搭後愈嚟愈貪心，想要更多，大家都唔捨得放手…夏巧莘將手纏到凌御生頸上，凌御生伸手攬過夏巧莘嘅腰，兩人之間嘅距離變得更近
吻，逐漸變得熾熱，冇人知道終點喺邊度…只想呢個吻喺無人知曉嘅情況下偷偷延續
貪婪咁攫取着對方嘅氣息，身上沾到了對方嘅氣味
良久兩人分開，胸口不斷起伏，呢個吻簡直就要令人喘不過氣
深情嘅對望，然後又相視而笑…

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link