[愛情走糖故]兩個人心底中不為人知嘅秘密,成為兩個人間嘅牽引: 36.怦然心動

夏巧莘嘅臉「唰」一聲就紅咗，臉頰瞬間就變得紅彤彤的
凌御生知道自己又逆襲成功，滿足咁笑起嚟，慢慢鬆開咗手
夏巧莘呆咗咁望住再滿足咁笑嘅凌御生，腦袋中一片空白然後唔知講啲咩好
「做咩面紅呀？」凌御生問道，然後扮到一臉錯愕咁講：「你真係中意我㗎？」
「冇人中意你囉…」夏巧莘耷低頭繼續切午餐肉
「但你塊面紅晒啦喎～」凌御生微微耷低頭望夏巧莘
「正常女仔聽到都會面紅啦…」夏巧莘行到洗手盆前洗手
「真係？」凌御生俯身向前直盯住夏巧莘
「煮飯啦你！」夏巧莘用水彈凌御生
「Okay～去睇電視啦怕羞嗰個。」凌御生捉起衣領抹面，然後彎腰喺櫥櫃中拎咗個鑊出嚟放喺爐頭上




夏巧莘乖乖咁坐到梳化上睇電視，望住呢個72吋大電視，睇咩都覺得特別好睇
凌御生企喺廚房，望一望夏巧莘，屋企只有兩個人，望住佢坐喺梳化上睇電視就好似望住女朋友或者老婆正喺度等自己煮好飯咁
喺呢一刻，凌御生突然間都有少少希望佢同夏巧莘之間有未來可言，呢一刻嘅場景就好似真係未來發生嘅事一樣
喺凌御生心中對夏巧莘嘅感覺又再提升咗少少，眼前呢個女仔大概係第一個可以令自己真係會動心會不自覺溫柔嘅人
平日喺身邊嘅人，對自己永遠只有「抗拒」，或者因為已經習慣咗被抗拒，所以佢都會自然咁抗拒其他人
鍾家豪同凌御生，兩個人一開始已經係好兄弟，由中一開學第一日開始，兩個人好似已經有共識知道對方同自己係同一類人，所以先可以做到好兄弟，鍾家豪先可以做到第一個接近凌御生嘅人
凌御生喺事實上其實係個比較抗拒主動接觸自己嘅女仔，但係唯獨完全唔抗拒一直對自己主動嘅夏巧莘，仲開始…有啲動心…
夏巧莘望住電視，但係個腦入面完全唔係諗緊電視劇集中嘅嘢
「個心仲係噗噗噗噗咁跳…」夏巧莘雙手環抱住曲着踩喺梳化邊嘅雙腿，喺心入面喃喃自語道，「突然咁講邊個會唔面紅…」
夏巧莘偷偷回頭望向廚房，凌御生煮緊飯已經，心臟跳得仲快，頓時就轉番過去望電視




「太快啦太快啦！」夏巧莘耷低頭，獨自臉紅着，喺心中緊張咁講道，「心跳得太快啦！」
喺廚房嗰邊飄嚟陣陣香味，凌御生將飯餸上碟，放到餐枱上，但夏巧莘發緊呆，仍然坐喺原位郁都冇郁過
「食得啦！」凌御生行到夏巧莘身後拍佢
「嗯！」夏巧莘瞬間擰轉頭，自然咁露出笑容
凌御生有啲疑惑，因為夏巧莘一副若有所思嘅表情
「我唔知你食幾多飯，所以就咁裝咗半碗比你。」凌御生遞咗一對筷子比夏巧莘
「其實都夠㗎啦…」夏巧莘微微一笑，然後接過筷子，「食飯～」
「食飯。」凌御生望住夏巧莘一臉高興，不禁跟住佢微笑起嚟
夏巧莘一下就夾咗塊午餐肉，咬咗一啖，食一啖飯
「Okay？」凌御生抱着期待望住夏巧莘




「Okay！」夏巧莘用力點頭，「你同我細佬好似，你地都識煮飯。不過你好似煮得好食啲。」
「呢個年代有幾多個男仔唔識煮飯？總會識少少簡單嘅～」聽到夏巧莘嘅稱讚，心中不禁有少許自豪
「識係一回事，煮得好唔好食又係一回事…」夏巧莘講得頭頭是道，「我淨係識啲簡單嘅小菜，但感覺煮飯好麻煩…」
「咁第時搵個會煮飯嘅人結婚囉～」凌御生夾菜放入口，「以你嘅條件要搵一個都唔係好難。」
「咁我覺得呢啲嘢要睇感覺嘅～」夏巧莘側着頭道，「不過將來先算啦～有排～」
夏巧莘其實喺心入面好想問凌御生中意咩類型嘅女仔，但佢知道自己一開口問，凌御生就會知道佢中意佢

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link