[愛情走糖故]兩個人心底中不為人知嘅秘密,成為兩個人間嘅牽引: 26.開始變化的感覺

凌御生下意識就行到夏巧莘面前，擋喺佢前面
一個手臂上有紋身嘅男人打開門行入嚟，第一眼就望到凌御生，同喺佢身後嘅陌生少女
「你好…」夏巧莘有啲驚，手喺凌御生嘅背後，輕輕捉住佢嘅衣角，對住呢個男人微微點一點頭
「唔洗咁驚喎。」凌御生嘅老豆閂上門，笑一笑，喺褲袋拎出一盒煙同火機放喺鞋櫃上，然後望向凌御生，「大個仔啦，識咗女朋友都唔同老豆講。」
「你都要番去啦，早啲番去。」凌御生無視老豆講嘅嘢，直接就轉身同夏巧莘講，「我送你番去。」
「嗯…」夏巧莘點點頭，微微一笑，「唔洗送我啦，我自己番去就okay～」
「咁好啦，你番去小心啲。」凌御生點點頭
夏巧莘拎起手袋，著番對鞋
「凌御生你唔送埋人地番去？女仔，危險呀。」老豆行到梳化坐低，然後一手將條車匙拋咗比凌御生，凌御生一手就接住咗
「我送你。」凌御生伸手推着夏巧莘嘅背




「呃…我走先啦…」夏巧莘小心翼翼咁對住凌御生老豆講
「行啦。」凌御生拉住夏巧莘行到門口踏出家門
「其實你真係唔洗送我。」夏巧莘一踏出佢家門就講
「得啦，唔洗客氣。」凌御生板起臉，夏巧莘都唔敢再出聲
凌御生帶住夏巧莘落到地下嗰層，然後經旁邊嘅升降機落到停車場
「去邊呀？」夏巧莘問
「揸車送你番去。」凌御生拎咗條車匙出嚟，然後㩒咗一下，喺離二人不遠嘅地方有一架私家車嘅車頭燈閃咗一閃
夏巧莘行喺凌御生旁邊，兩人行到去車前，凌御生行到去副駕位旁開咗車門，夏巧莘上咗車之後凌御生閂上門，行到去駕駛位上車
「係咪番去呀？」凌御生扭車匙踩油門
「我未想番屋企住…」夏巧莘嘅手袋平放喺大腿上，耷低頭苦笑道，「番到去又要對住我細佬…佢又要囉嗦一輪…」




凌御生嘅表情稍稍緩和，佢伸手去㩒咗個制去播歌
「啱啱你爸入嚟嘅時候真係嚇咗我一跳。」夏巧莘嘗試打開話題，佢留意到凌御生嘅表情，於是苦笑起嚟，「你唔好黑面啦～」
「冇。」凌御生快而簡咁回答
「你有呀…你黑晒面啦…」夏巧莘微笑道
凌御生停咗車，夏巧莘望向外面，原來已經到咗屋企
夏巧莘以為凌御生想佢走，所以駛嚟呢度，夏巧莘解開安全帶，然後推開門
「你去邊？」凌御生問，「你唔係唔想番屋企咩？」
「但你停咗喺呢度，唔係叫我番屋企嘅意思咩？」夏巧莘反問
「吓…？」凌御生嘅第一個反應係疑惑，第二個反應係笑咗出嚟，「我停喺呢度，一係因為呢個位可以泊車，二係因為方便你陣間番去。當然你想番去嘅話可以落車。」
當凌御生講完呢句之後，夏巧莘閂番車門坐番好，但凌御生仲喺度笑緊




「你終於識笑啦？」夏巧莘將身子向前傾，然後甜甜一笑挪揄道，「仲以為你一直都要黑面添～」
「冇黑面…」凌御生尷尬咁撥一撥頭髮
眼前呢個男仔點解就會咁可愛？夏巧莘耷低頭一笑
凌御生解開安全帶，左手一下子繞到夏巧莘頸後，夏巧莘抬頭望去佢嘅同時，凌御生手一用力，將夏巧莘拉向自己，一下子吻向佢
呢個突如其來嘅吻，好成功咁令夏巧莘嘅心瘋狂快速跳動
夏巧莘伸手掩住嘴，一臉愕然咁望住凌御生，嘴都合唔上
「你成日都突襲我，今次仲唔到我突襲你？」凌御生鬆開手，調皮咁吐舌頭
第一次…喺一個唔係家人嘅人身上搵到安全感；第一次…因為一個男仔而令心臟瘋狂咁快速跳動；第一次…同一個家人之外嘅人訴說自己嘅心事
因為有凌御生嘅出現，自己嘅擁抱、初吻都比咗呢個人…明明就只係一個普通男仔，點解對佢嘅感覺會咁唔一樣？

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link