[愛情走糖故]兩個人心底中不為人知嘅秘密,成為兩個人間嘅牽引: 27.自嘲

或者係因為…凌御生係第一個同自己行得咁埋嘅男仔啦…
「夏巧莘…」凌御生眼見夏巧莘仍然愕然得冇辦法合上口，仲有啲放空，於是輕喚佢
當夏巧莘再次回神過嚟嘅時候，凌御生右手捉住咗軚盤，側住身坐，直勾勾咁望住佢
「你唔好愛上我。」凌御生揚起嘴角，「我同你係天南地北一樣。」
「我…」夏巧莘湊近凌御生，「先唔會愛上你。」
夏巧莘講完又向往退，然後露出淡淡嘅笑容
「你都唔好愛上我喎～」夏巧莘用番同一句說話嚟回敬凌御生
「我先唔會。」凌御生回答
睇嚟兩個人之間，秘密又多咗…不過今次，對方並唔知道自己嘅呢個秘密…
「好啦，我今次真係番去啦…」夏巧莘微微一笑道


「嗯，拜拜。」凌御生雙手搭喺軚盤上
夏巧莘推開車門落車，凌御生目送住佢離開嘅背影，見到佢推門入咗大堂之後就開車走
「我番嚟啦…」夏巧莘推開家門，疲倦嘅感覺湧上心頭
夏學謙低聲嗯咗一聲，繼續睇電視
夏巧莘頓時去浴室沖個涼，畢竟成晚都冇沖過涼，都係要沖一沖身先得
熱水喺水龍頭流出，當水浸到去浴缸嘅三分之二嘅時候，夏巧莘閂上水龍頭
白滑纖纖嘅腿踏進水中，頭上梳起咗一個髮髻，慢慢咁坐到水裏
「哈…」夏巧莘突然好似鬆咗一口氣咁，「沖涼都係好舒服…」
凌御生將駕車駛入自己住嘅嗰棟樓嘅地下停車場，拎住車鎖上番去屋企
一打開屋企嘅大門，就見到老豆坐咗喺梳化


「番嚟啦？」老豆望住電視問道
「嗯。」凌御生冷冷咁嗯咗一聲
「之前都冇見過你帶女仔番嚟。」老豆望向凌御生，「合眼緣？」
「嗯…」凌御生嘅回答仍然好冰冷，「可能係真係合眼緣掛。」
凌御生講完之後就推開房門入咗房，閂上房門，一步一步行到去窗檯坐低
老豆坐喺梳化上，望住凌御生入房，罕有咁露出淡淡嘅笑容，心中覺得有啲安慰，右手自然咁摸着左手無名指上嘅戒指
凌御生坐喺窗檯上向外望出去，雙眼放空，曲起咗一直腳，手拎住電話，上臂放咗喺膝蓋上
腦海中響起咗夏巧莘嘅聲音，佢今日同自己講嘅嘢，仲喺腦海中迴盪
「但唔知點解同你一齊嗰陣，我覺得好有安全感…」
「只係覺得，你其實都係個唔錯嘅人啫…」


「安全感」呢三個字，凌御生從來冇諗過會被套用喺自己身上
一個女仔，話自己比到安全感佢…凌御生諗到起點，不禁笑咗一笑…係嘲笑自己嗰種笑…
自己，又有咩資格比安全感人？睇下自己老豆同媽媽就知道…
所以喺最後先會同夏巧莘講自己並唔係嗰個可以令佢幸福嘅人，就算夏巧莘唔係中意自己都好，都要先比一個「警告」佢，話佢知唔好愛上自己…
另一邊廂，夏巧莘沖完涼，換番居家服，舒服好多
夏巧莘行出客廳，坐喺夏學謙隔離，兩姊弟一齊睇電視
「家姐…」夏學謙望住電視講
「做咩？」夏巧莘望咗夏學謙一眼，然後又望番住個電視
「你對佢，到底係咩感覺？」夏學謙已經係唔知第幾次問呢個問題
「呢個問題重要咩？」夏巧莘嘅眉頭輕輕一皺，「點解你就要咁執着於呢個問題呢？」
「佢係咩人大家都知，你仲同佢行到咁埋。你係我家姐嚟㗎，我擔心你有咩問題？」夏學謙反問
「我唔明點解你就要一口咬定佢係衰人囉！」夏巧莘罕有咁板起臉望向夏學謙，「你有同佢相處過咩？你了解佢咩？點解你就要咁樣先入為主？」
「我先入為主？」夏學謙比夏巧莘挑起咗火頭，反駁道，「你好了解佢咩宜家？佢係咩人你好清楚？」

IG Link: https://www.instagram.com/nd_cotttoncandy/?hl=zh-tw


回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link