[愛情走糖故]兩個人心底中不為人知嘅秘密,成為兩個人間嘅牽引: 25.在他的身上，找到了安全感

「見證住我爸媽離婚，我爸拋棄咗我媽…就喺嗰一刻開始，屋企變得好冰冷…一切都變得暗淡無光…」夏巧莘慢慢坐起身，雙眼放空，「屋企有爸媽，有細佬，一切都好好㗎本來…但我爸竟然拋棄咗我媽…我嘅家本來因爸媽嘅愛而產生溫暖，但係…最後就變成咗咁…」
喺夏巧莘嘅腦海中，對爸爸嘅印象好模糊…自從爸媽分開之後，自己就已經再冇搵個爸爸，爸爸亦冇搵過自己…
對爸爸嘅感覺係恨？唔係…早就已經冇感覺…喺腦海之早，已經唔記得仲有爸媽喺身邊疼愛自己嘅時候係幾時啦…
凌御生聽住夏巧莘講，默默咁輕輕一笑，諗起咗自己嘅爸媽…
「媽媽有病之後，屋企就變得更冰冷，更冇安全感比我…」夏巧莘抬起頭，望向冇開嘅電視，「每日番到屋企，只有我同細佬兩個人…喺一個冰冷嘅屋企入面，對做陪酒都已經開始覺得麻木…然後放工之後又再番到一個冇安全感嘅地方…」
夏巧莘慢慢企起身，一步一步咁行向廚房，行到去凌御生嘅背後，伸出雙手環抱住凌御生嘅腰
「人人都話，同自己最愛嘅人一齊會覺得幸福…但係點樣先係幸福…？」夏巧莘嘅額頭貼喺凌御生嘅背上
凌御生閂上水喉，雙手嘅手臂搭喺洗手盆嘅邊緣上
「唔知…你要搵到嗰個可以令你幸福嘅人先…」凌御生抽水抹手紙抹手，然後轉身面向夏巧莘，「但我諗，我並唔係嗰個可以令你幸福嘅人。」
夏巧莘冇出聲，額頭靠喺凌御生嘅博頭上，啱啱一攬住凌御生嘅瞬間，心中嘅安全感湧出，不安嘅感覺莫名其妙咁消失咗




「唔知…」夏巧莘仍然攬住凌御生，凌御生嘅雙手放喺旁邊，㩒住喺洗手盆邊，「但唔知點解同你一齊嗰陣，我覺得好有安全感…」
「安全感？同我一齊嗰陣？」聽到夏巧莘咁講嘅時候，凌御生有啲愕然，呢個係意料之外嘅事
「嗯…所有嘅不安感都突然喺一個瞬間消失晒…」夏巧莘毫不掩飾咁講出嚟，「就好似冇嘢要擔心一樣…」
「你唔會想同我呢種人一齊㗎～你心理作用啫～」凌御生笑一笑
「或者因為你知道咗我嘅秘密，終於有人同我分擔呢個重擔啦…」夏巧莘抬頭望佢，微微一笑，「一唔一齊係睇感覺嘅～唔係想唔想，係啱唔啱嘅問題啫～」
「做咩啫，你中意我呀？」凌御生揚起嘴角，「我地可係冇情侶之名㗎～」
喺夏巧莘心中，當然知道自己同凌御生嘅關係有幾瞹眛，但係佢完全唔抗拒凌御生呢個人，唔介意同佢有瞹眛嘅關係…佢都唔知道到底呢個男仔有咩魅力令自己唔抗拒佢
真係因為佢知道佢嘅秘密咁簡單？
「我冇話中意你喎～」夏巧莘鬆開手，雙手擺喺身後，左手輕輕捉住右手嘅手腕，轉身行開咗兩步，微微耷低頭，「只係覺得，你其實都係個唔錯嘅人啫…」
凌御生望住夏巧莘嘅背面，一把及至肩胛嘅長髮，著住緊身裙更能凸顯佢纖瘦嘅身材




佢唔討厭呢個女仔，同呢個人一齊嘅時候覺得好舒服自在，望住佢偶爾會有一種悸動嘅感覺
「琴晚你都冇對我做啲咩呀唔係咩？」夏巧莘擰轉頭望向凌御生
凌御生同夏巧莘對望着，但冇即刻回答
喺凌御生眼中，夏巧莘就係一個近乎完美嘅女仔，有外在美同時有內在美，「校花」呢個名亦非浪得虛名…
自己都係一個正常男人，都有色心起嘅時候，只不過同人渣嘅分別就在於佢識自制，知道咩係應該咩係唔應該
「咁我都係正常男人嚟嘅。」凌御生笑一笑，「只係未到人渣嘅地步啫～」
「果然係個可以令我有好感嘅人呢～」夏巧莘自己低頭偷笑道，但係冇將呢句講出嚟
夏巧莘對凌御生嘅好感，好似慢慢咁提高緊，每一次都會提高少少
「你笑咩呀？」凌御生側着頭望夏巧莘
「冇咩呀～」夏巧莘笑住搖搖頭




「咔嚓…！」
凌御生屋企嘅大門突然打開咗，兩人同時望向大門

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link