[愛情走糖故]兩個人心底中不為人知嘅秘密,成為兩個人間嘅牽引: 24.被拆穿了

「好香呀！」夏巧莘聞到香味，小急步咁行到餐枱前，「咩嚟㗎？」
凌御生將個大鐵碗放到枱上嘅隔熱墊上，然後拉開櫈坐低
「係炒飯呀！」夏巧莘瞬間雙眼發光，一臉驚訝咁望向凌御生，同時拉開木櫈坐低，「你點知我中意食㗎！」
「我唔知你中意食㗎，係我中意食咋～」凌御生笑一笑，「趁熱食啦！」
夏巧莘似乎對凌御生嘅印象又有啲改觀
食到中途嗰陣，夏巧莘突然望一望大門
「係呢…」夏巧莘望嘅視線由大門移到凌御生身上，「你屋企會唔會突然有人番嚟㗎…？」
「唔會。」凌御生回答道，「老豆今日先唔會番嚟。」
「你屋企真係好大～」夏巧莘再次驚嘆道，「淨係你間房都已經好大。」
「okay啦，其實夠住就得。」凌御生再盛第二碗炒飯


「識咗你一段時間，你到底讀咩科？」夏巧莘咁問，係因為佢發現佢根本唔知凌御生讀咩科，純粹有啲好奇
「我讀經濟、物理同化學。」凌御生好快就答，果然人不可以貌相，夏巧莘完全冇諗到佢讀呢幾科，「你讀咩科？」
「Geography、Chem同埋Bio。」夏巧莘回答道，佢同凌御生一樣，都係讀化學，但一個係讀中文，一個讀英文
「咁你以後咪可以教我？」凌御生笑一笑
「我讀英文喎…」夏巧莘無奈咁講，「你會努力讀書㗎咩？」
「我成績okay㗎…」凌御生一臉無奈
夏巧莘嘅手機響，係夏學謙打嚟
「噓…」夏巧莘對凌御生示意唔好出聲，然後㩒下接聽，「喂？做咩呀？」
「你喺邊呀？」對面傳嚟夏學謙嘅聲音
夏學謙去完同學屋企過夜溫書，啱啱番到屋企，卻見唔到夏巧莘嘅身影，唯有打電話比夏巧莘


「我出咗去買啲嘢咋嘛。」夏巧莘隨便編咗一個理由，「你番到屋企啦？」
「你出咗去買嘢？」夏學謙拎住手機，皺起眉頭，拎起放喺門邊置物櫃上嘅一串鎖匙，「唔帶鎖匙就出咗去買嘢？你琴晚都冇番屋企。」
「我冇帶鎖匙啫～」夏巧莘望住凌御生苦笑起嚟
「你著住高踭鞋出去買嘢呀？」夏學謙再追問
夏巧莘冇作出任何回答，始終紙包唔住火，再加上呢個細佬嘅邏輯思維同分析能力好強，就算有嘢想隱瞞佢，去到最後都會比夏學謙睇穿
「唉～你安全就得啦…」夏學謙沒好氣咁講道，將鎖匙放番低喺置物櫃上
「嗯，我晏啲就番嚟㗎啦。」夏巧莘笑一笑
「嗯，拜拜。」夏學謙掛斷電話，行到梳化坐低成個人斜住咁坐，望住斜上方
連高踭鞋都唔喺鞋櫃入面，夏巧莘又點會係番過屋企之後先再出去？
夏學謙又點會唔知道夏巧莘嘅喜好？呢個家姐平時如果唔係番工嘅話，根本就唔會著高踭鞋，因為嫌著住高踭鞋辛苦，所以唔中意著，所以係冇可能著住對3吋踭嘅鞋「落街買嘢」


喺凌御生屋企嘅夏巧莘趴喺枱面，一臉無奈
「做咩呀？」凌御生將空嘅飯碗放低，因為眼前嘅大鐵碗已經空空如也
「嘻…」夏巧莘輕輕一笑，「比夏學謙識穿咗啦…我琴晚冇番到屋企…」
「你咁講佢唔識穿你就假啦…」凌御生企起身，將兩個碗疊埋一齊放入鐵碗中，然後將兩隻匙羹都拎起放入鐵碗中，再將鐵碗連隔熱墊拎起，轉身行去廚房
夏巧莘郁咗一郁，雙臂交搭，下巴靠喺雙手之上；雙眼望住企喺洗手盆前洗碗嘅嘅凌御生嘅背影
「我呀…其實一啲都唔中意番屋企…」夏巧莘就好似開始訴說着自己嘅心事一樣，好似講緊比凌御生聽，但又好似唔係，「屋企本應係一個好溫暖嘅地方，可以比到人安全感…但係喺我眼中，我嘅家係幾咁冰冷…連呼吸嘅空氣都係凍嘅一樣…」
凌御生嘅拎起加咗洗潔精嘅百潔布，開住水沖洗碗筷；耳朵卻聽緊夏巧莘講嘅嘢

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link