[愛情走糖故]兩個人心底中不為人知嘅秘密,成為兩個人間嘅牽引: 23.他的家

去到第二朝早，夏巧莘醒過嚟，一睜開眼嘅時候，發現自己身處嘅地方好陌生
蒼青色嘅牆身、左邊銀黑色嘅高身衣櫃、右邊深啡色嘅木枱、藏青色嘅窗簾,床尾嘅位置
陽光因為窗簾而無法從落地玻璃窗中照入嚟，但係卻喺另一邊嘅窗檯照入嚟
夏巧莘望下四周，慢慢用手撐住個人坐起身
對琴晚嘅事，腦海中完全一片空白，淨係記得去到最後見到凌御生，之後就唔記得晒
「終於醒啦？」凌御生從窗檯上落咗地下，身上著住T-shirt同灰色短褲
「頭好痛…」夏巧莘皺起眉頭伸手扶住額角，當佢望到凌御生嘅衣著嗰陣，頓時拉開張被望一望自己有冇著衫之類
「我咩都冇對你做過呀！」凌御生行到書枱前面，拉開張櫈坐低，望向夏巧莘
「我成陣酒味仲瞓落你張床度，sorry呀…」夏巧莘一臉抱歉
「咁你洗唔洗去沖個涼？最多我借件白色裇衫比你著住先啦～」凌御生開玩笑道




「唔洗呀！陣間番屋企先沖。」夏巧莘無奈咁笑一笑，「不過你張床好好瞓～瞓得好舒服。」
「喺度住囉，晚晚都可以瞓到呢張床。」凌御生企起身，再行到去床邊然後爬上床，坐喺床上面，「不過你就要同我一齊瞓啦～」
「你就想呀～咁咪便宜咗你囉！」夏巧莘露出笑容
「你肚唔肚餓呀？洗唔洗食嘢呀？」凌御生問道
「少少…」夏巧莘㩒住個肚，然後露出甜甜嘅笑容側着頭，「你煮比我食呀？」
「我都餓，順便煮埋比你㗎咋～」凌御生裝作一臉嫌棄
凌御生落咗床，行咗出房，睡房中只有夏巧莘一人坐喺床上
琴晚凌御生突然出現，將自己一把攬到懷中護着…唔知點解，喺佢嘅懷裏令夏巧莘不禁有安全感，安心咁留喺佢嘅懷裏，彷彿咩都唔需要理會，因為有佢喺度
夏巧莘望向窗檯，上面放咗一張堆埋咗一齊嘅冷織嘅被
「佢琴晚就坐喺呢度瞓？」夏巧莘心諗，不自覺就微微揚起嘴角，「估唔到凌御生份人，有時…又幾信得過，幾gentlemen…」




夏巧莘移到床邊，然後落咗床，幫凌御生鋪番好張床，擺番好啲嘢
一踩落地，就踩咗喺張地毯上面，低頭一睇，張地毯都好大張，鋪咗喺床底，由床嘅中間延伸至長方形嘅電視櫃前
宜家睇真啲，原來喺床嘅左邊放咗一個床頭櫃，上面放咗一幅凌御生同佢媽媽一齊影嘅相，另外放咗一盞枱燈
成間房嘅設計、用色配搭都好好，睡房以藍、灰、黑色為主，基本上都係深色啲嘅傢俱
夏巧莘赤腳行到去深啡色嘅木門前，見到佢自己對高踭鞋放咗喺燈制下面，佢彎下腰拎起對鞋行出房
一行出凌御生間房，就係一條短嘅走廊，走廊嘅盡頭有另一道深啡色嘅木門，嗰間係主人房
凌御生嘅睡房對面仲有兩間房，右邊嘅係廁所，左邊係書房
夏巧莘轉向右邊行出客廳，一行到客廳，夏巧莘不禁一臉驚訝咁掩住嘴
「嘩～」夏巧莘驚嘆咁瞪大眼
凌御生屋企比自己屋企大好多，淨係個客廳都等於兩間凌御生嘅睡房咁大




企喺走廊望嘅話，喺客廳嘅左中位係大門，大門嘅左邊係一個半開放式嘅廚房，右邊放咗一部鋼琴
客廳嘅右邊放咗一張L字形嘅梳化，梳化對住一部72吋嘅電視，梳化同電視櫃之間放咗一張玻璃面嘅茶几
梳化後面嘅空間就係飯廳，放咗一張長方型嘅四人枱
喺飯廳同梳化之間有一道落地玻璃門，推開落地玻璃門就可以出到露台
露台嘅左邊放咗一張用鐵架吊住嘅吊椅，右邊放咗一張細嘅圓形玻璃枱同兩張木櫈
「你參觀完我屋企未呀？」凌御生拎住兩隻碗同匙羹喺廚房行去餐枱前，「食嘢啦！」
「你屋企真係好大呀！」夏巧莘仍然處於驚訝嘅狀態
凌御生再行番入廚房，再出嚟嘅時候拎住一個大鐵碗出嚟，佢一踏出廚房，隨即傳嚟陣陣香味

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link