[愛情走糖故]兩個人心底中不為人知嘅秘密,成為兩個人間嘅牽引: 22.間接表白

夏巧莘一下子就纏上凌御生，雙手搭到佢博頭上，雙手手腕喺佢頸後交搭着，側着頭望凌御生
「你乖乖地瞓好啦～」凌御生捉住夏巧莘嘅手臂，試圖等佢唔洗攬住自己
「唔要！」夏巧莘搖搖頭，然後收窄咗雙臂之間嘅空位，收窄到雙手嘅手掌碰到手肘，「唔…要…」
夏巧莘一小步一小步向前行，凌御生一小步一小步向後退
退咗兩步，腳踭已經碰到身後嘅衣櫃，夏巧莘就喺眼前，上半身幾乎都要朝自己貼上嚟
「夏巧莘，瞓上床好唔好？」凌御生問道
「唔～」夏巧莘搖搖頭，但係轉個頭就鬆開咗手，然後轉身行床邊坐低，向後瞓低喺床上面
張床軟綿綿，張被好涼，好舒服，夏巧莘喺迷糊間見到凌御生企喺衣櫃前
凌御生望住夏巧莘，一副無奈嘅表情，佢都唔知可以講啲咩…凌御生行到床邊，背對住夏巧莘坐低
佢發現原來要照顧一個人真係好難，特別係一個醉咗然後仲會發酒瘋嘅人…


夏巧莘矇矇矓矓間見到凌御生坐低喺床上，然後伸手從後捉住凌御生一邊博頭用力一拉，凌御生無力咁向後瞓低咗喺床上面
凌御生先啱啱瞓低，夏巧莘就坐起身，毫不猶疑咁將隻腳跨過咗凌御生
當凌御生意識到夏巧莘要坐喺佢身上嘅時候即刻就坐起身，但已經太遲，夏巧莘已經坐咗落去，雙手搭住喺凌御生博頭上然後整個人向前傾，凌御生又再次往後跌，夏巧莘整個人壓喺佢身上
「咳…」凌御生微微揚起嘴角，用乾咳嚟掩飾自己嘅尷尬咁，「你想點呀？」
「冇想點…」夏巧莘耷低頭錫凌御生，用自己嘅唇令佢閉嘴
凌御生就咁樣比夏巧莘壓咗喺床上，夏巧莘坐喺佢大脾上，上身完全壓喺凌御生身上
「咳…咳咳…你好重呀…咳…」凌御生比口水嗆到，微微揚起嘴角一笑，「咳…你成陣酒味…咳咳…」
「但你中意。」夏巧莘喺凌御生耳邊細聲道
「我幾時有講過話我中意呀？」凌御生無奈一笑，然後一手捉住夏巧莘嘅手腕，「你想做咩呀？」
夏巧莘嘅手放喺凌御生嘅皮帶扣上


「你飲酒前後真係兩個人嚟…」凌御生捉住夏巧莘嘅手腕，將佢隻手從皮帶扣上移開
「你中意咪得囉…」夏巧莘喺凌御生嘅耳骨上輕輕咬咗一下，然後慢慢坐起身
「你咁樣講，係間接表白？」凌御生輕輕一笑
「只有人地中意我，冇我中意人…」夏巧莘充滿酒氣嘅微笑，顯得更妖魅，更有魅力
「可能今次會例外呢～」凌御生用盡力氣坐起身
「睇下點…」夏巧莘伸手攬住凌御生，下巴靠喺佢嘅博頭上
過咗一陣，夏巧莘冇再出聲，凌御生只敢稍微郁一郁，望下夏巧莘係咪瞓着咗，怕動作太大會嘈醒佢
「夏巧莘？」凌御生輕喚道
凌御生望一望，發現夏巧莘已經瞓着咗，於是輕輕力抱起夏巧莘，打開張被，放咗佢喺床上，然後幫佢蓋好被
凌御生閂上房燈，然後輕手輕腳咁行離床邊，行到門前輕輕力閂上房門，所有嘅動作都放輕咗，佢行咗去房間嘅一個呈L字型窗檯，然後坐咗上去


喺窗檯上放咗一張用冷線織出嚟嘅被，放咗一個長型嘅灰色抱枕，長型抱枕前放咗兩個海藍色嘅方型抱枕
凌御生坐喺面對住門口嗰邊，可以望到門口同時，望過少少就可以望到夏巧莘，佢耷低頭睇手機，睇ig睇facebook
夏巧莘瞓喺床上側住咁弓着身子熟睡中，突然踢咗一下被，將張被踢開咗
凌御生聽到聲，即刻就望過去，見到夏巧莘踢開咗張被，凌御生突然好似發現咗啲咩一樣行到去門前，伸手開咗個冷氣制
原來啱啱顧住眼前嘅夏巧莘，都唔記得咗開冷氣，凌御生企喺門前，驚覺自己仲未沖涼，於是就拎好衫褲去浴室沖涼

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link