[愛情走糖故]兩個人心底中不為人知嘅秘密,成為兩個人間嘅牽引: 05.姊弟

夏學謙行上鈄路，望向夏巧莘番工嘅嗰間酒吧，但卻見唔到夏巧莘喺門口等佢
夏學謙心裏一急就急步斜線行向酒吧
「家姐去咗邊呀…！？」夏學謙心中極為焦急，左顧右盼的
夏學謙跑上鈄路一小段，差唔多到酒吧門前嘅時候，佢停低咗落嚟
拎起手機，喺通訊錄入面搵夏巧莘的電話
「嘟～嘟～、嘟～嘟～、嘟～嘟～…你所打嘅電話號碼暫時未能接通，請---」夏學謙聽到手機飛咗去留言信箱，心中就更急，掛斷電話再搵，心諗：「佢應該唔會行得好遠㗎…」
夏學謙拎住手機，然後再向上跑，正當佢拎起手機打算再打電話比夏巧莘嘅時候，佢成個人愣住企喺原地，手亦停留咗喺半空
雙眼望住後巷嘅方向，望到嗰個熟悉不過嘅身影被另一個男嘅攬喺懷中熱吻
「喂！」夏學謙頓時吆喝咗一聲並且跑向後巷，走到兩人前面時嘅第一件事，係一手推開咗個男嘅，仲要一拳落喺佢臉頰上，「你對我家姐做咩呀！離佢遠啲！」
夏學謙一手攬住已經半醉醺醺，但都清楚咗一半嘅夏巧莘嘅肩膀，除下外套披喺夏巧莘身上




「你咪係夏巧莘嘅細佬？」被推開而且仲受咗一拳嘅凌御生企好起嚟
「凌御生！？」夏學謙呢一下先有機會望清楚對方係邊個
睇到係凌御生嘅瞬間，佢一臉驚訝，同夏巧莘熱吻嘅人竟然係凌御生
「你竟然趁我家姐飲醉咗抽佢水！？你真係衰到貼地！」夏學謙瞪着凌御生
「你冷靜啲先～」凌御生笑起嚟，「你情我願邊度叫抽水？」
「我家姐會同你講你情我願？你講嘢呀？」夏學謙冷笑道，完全唔相信凌御生講嘅嘢
「你唔信嘅問下你家姐囉～」凌御生輕佻地笑道，然後望向夏巧莘
「我地走啦。」夏學謙微微低頭望向夏巧莘，左手繞過佢嘅背攬住佢博頭，一手捉住佢右邊手臂，然後將佢個手袋孭喺自己度，扶住夏巧莘行咗兩步又停低咗，對凌御生警告道，「凌御生，你唔好接近我家姐。」
夏學謙扶住夏巧莘行到馬路邊捷咗架的士，兩個人坐上車，夏學謙將右邊嘅車窗較低，好等有風吹下，等夏巧莘清楚下
「咳咳！咳…！」夏巧莘咳咗兩聲




「你點呀…」夏學謙問道
「冇嘢…」夏巧莘搖搖頭，然後靠喺夏學謙嘅肩膀上，「醒番啲啦…有啲頭痛…」
「家姐…你同佢真係你情我願？」夏學謙問道
夏巧莘靜咗一靜，然後用喉嚨發音道：「嗯…」
「家姐呀…」夏學謙望住夏巧莘一副有苦說不出嘅表情，心中有千萬種難受，「屋企有事，唔係應該我地兩姐弟一齊分擔㗎咩？點解呀…」
「錢…」夏巧莘苦笑道，「只有搵到足夠嘅錢就夠啦…」
「佢屋企有黑社會背景㗎…」夏學謙一臉擔心，「你會有危險㗎…」
「唔洗驚…冇事㗎…」夏巧莘拍拍夏學謙嘅手背
夏巧莘心中當然知道「挽感情」嘅意思係咩啦…但係佢卻冇打算同夏學謙講
夏學謙心中知道夏巧莘其實有所隱瞞，但係既然夏巧莘決定唔講，佢亦尊重佢嘅決定




兩姐弟相差兩年，今年先啱啱過咗幾個月16歲讀緊中四嘅夏學謙，同18歲嘅夏巧莘
你以為姐弟一定係吵吵鬧鬧？佢兩個就唔係，夏學謙平日對夏巧莘看似好冷漠，但其實心中好關心夏巧莘
知道夏巧莘自從屋企出咗事之後，成為屋企唯一嘅支柱，佢亦只可以做到幾多得幾多…
…
「你行得未呀？」夏巧莘坐喺鞋櫃隔離張小木櫈上，一邊著鞋一邊嗌度
「得啦。」夏學謙打開房門，一邊索緊條呔，一邊行出嚟
今日夏學謙突然話同夏巧莘一齊番學，兩個人一齊出門口搭巴士番學
兩個人坐喺巴士上層，夏巧莘同夏學謙兩個人，一人戴住一個耳機
「做咩今日突然同我一齊番學嘅？」夏巧莘問完之後過咗一陣，突然自己笑咗出嚟，「因為凌御生？」
夏學謙冇出聲，只係合埋眼聽歌

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link