[愛情走糖故]兩個人心底中不為人知嘅秘密,成為兩個人間嘅牽引: 04.交易，確定

「宜家屋企咁樣，我係屋企嘅支柱…」夏巧莘有少許無奈，但亦係事實，「細佬你努力讀書，拎多啲獎學金就夠㗎啦～」
「家姐呀！我可以出去做part time賺錢㗎！你唔好再做陪酒啦！」夏學謙嘅怒火瞬間溢出，「我大個仔啦！」
「你聽家姐話啦…」夏巧莘知道夏學謙擔心啲咩，所以冇發脾氣，反而心平氣和咁同佢講，「我okay呀…我唔會有事。」
「家姐…」夏學謙知道自己姐姐嘅倔強，但係心中嘅擔心冇一日停過落嚟，「我琴晚冇去接你一晚咋…今日就咁樣啦…你平時都唔同佢呢啲人講嘢嘅…」
「我冇事呀…」夏巧莘拍一拍夏學謙嘅手背，「你信我啦～」
夏巧莘冇將同凌御生之間發生嘅事講出嚟，但佢嘅心事重重卻無法騙過夏學謙
夏學謙拎住書包行番入房，心中就係凝住有事發生咗，但係夏巧莘唔講，佢亦冇辦法
…
夜晚 00：30 酒吧
著住黑色緊身裙連同3吋高踭鞋嘅夏巧莘喺VIP客房扶住個客行出嚟




個客將一卷厚厚嘅啡色鈔票窒入夏巧莘嘅手中
「多謝你呀老闆～」夏巧莘望住呢一卷鈔票，露出笑容恭敬咁講，「下次再嚟搵我呀～」
夏巧莘將卷錢收好咗之後，就準備收工
佢托住額頭，左搖右擺咗行出嚟
「一定喺上一輪陪個客飲得太多啦…好暈呀…」夏巧莘行出酒吧
呢個時候手機響，夏巧莘喺手袋入面摷咗部機出嚟，見到聯絡人寫住「夏學謙」就即刻接聽
「喂…」夏巧莘醉醺醺咁踏出酒吧門口
「家姐你放啦係咪？」啱啱落車嘅夏學謙問道，「我過緊嚟啦，你唔好行開。」
「嗯…我喺酒吧門口…」夏巧莘企喺平路上都企得唔太穩，一時則向左邊，一時則向右邊
「你唔好周圍行，我宜家過嚟，好快。」夏學謙講完就收咗線，心諗住要快啲接夏巧莘一齊番屋企，避免佢又有危險




夏巧莘一人企喺酒吧門口等夏學謙嚟接佢
突然一陣噁心嘅感覺湧上心頭，夏巧莘跑到後巷，手㩒住牆借力喺後巷嘔
「咳…！咳咳…！咳…！」夏巧莘嘔乾淨之後咳起嚟，突然有個黑影擋喺佢隔離，伸手遞咗支水比佢
夏巧莘心中覺得應該係夏學謙知佢會嘔得好辛苦，所以特意買支水比佢漱漱口，於是冇諗太多就接過水，扭開咗瓶蓋呷咗兩啖
「唔該…」夏巧莘拍了拍心口，伸手捉住對方嘅前臂
但喺下一個抬頭嘅瞬間，見到嘅唔係自己細佬夏學謙，而係凌御生，嚇到夏巧莘即刻鬆開咗手，不穩咗後退兩步
豈料凌御生見到佢不穩醉醺醺咁就嚟跌，即刻就行上前一步伸手攬住夏巧莘嘅腰
「你又嚟做咩呀…」夏巧莘問道
「我特登嚟話你知我嘅交易內容係咩。」凌御生嘅雙手圍抱住夏巧莘嘅腰
「吓…？」夏巧莘嘅上身特意同凌御生隔開一少段距離




「我地咩都唔挽，我地…挽感情…」凌御生露出微笑，喺夏巧莘耳邊柔聲道
「哼…」夏巧莘冷笑一聲，「你當我咩呀…？PTGF…？」
「你覺得係PTGF就係PTGF囉～你覺得係咩就係咩～」凌御生瞇起眼笑道，「你都係想要錢啫係咪？」
夏巧莘撇開臉，紅彤彤嘅臉頰喺微弱嘅燈卷下顯得更誘人，再加上令身形盡顯嘅緊身裙，簡直係誘人萬分
「你挽唔挽呀？」凌御生嘅眼神銳利得似望到獵物一樣
「有錢萬事足…」夏巧莘輕輕吐出帶着酒氣嘅五個字
凌御生聽到夏巧莘嘅答案，露出滿意嘅笑容
一手攬過夏巧莘嘅腰，將佢拉到自己面前
「不良學生配校花，或者係個唔錯嘅選擇…」凌御生同夏巧莘對望着
「哼…唔會係…」夏巧莘冷笑一聲，雙手輕放喺凌御生嘅胸膛前
「你真係唔會後悔交易呀？」凌御生再問多次
「有錢…萬事足…」夏巧莘輕輕一笑
兩個人，喺後巷微弱嘅燈光下…用吻嚟確定交易…

IG Link: https://www.instagram.com/nd_cotttoncandy/?hl=zh-tw




回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link