[愛情走糖故]兩個人心底中不為人知嘅秘密,成為兩個人間嘅牽引: 06.逃課的他

夏巧莘眼見夏學謙冇出聲，自己偷偷笑咗一笑
落咗車之後，夏學謙望一望周圍，望左望右
「我去買早餐，你番去先。」夏學謙望向夏巧莘
「嗯，好呀～」夏巧莘微微一笑，然後就同夏學謙分道揚鑣
夏學謙先行開咗三四步，凌御生就靜靜地行上前攬住夏巧莘嘅肩膀行
「早～晨～」凌御生望住夏巧莘
「早晨～」夏巧莘對住凌御生微微一笑
「你對住我終於識笑啦喎！」凌御生鬆開咗手，插住褲袋行
夏巧莘冇出聲，只係靜靜咁喺隔離行
「你真係唔會後悔呀？挽到咁大。」凌御生望向夏巧莘




夏巧莘猶疑咗兩秒，然後搖搖頭
「都係嗰五個字…」夏巧莘露出淡淡嘅笑容
凌御生望住眼前呢個女仔，明明就會後悔，但係卻搖搖頭表示唔後悔
「有錢萬事足」，錢，對佢嚟講真係咁重要咩？
一個擁有仙女般嘅外表，就好似係神仙下凡般嘅女仔，會甘心去做陪酒，甘心為錢低頭…？
明明討厭自己呢一類型嘅人，但係因為一個「錢」字，而甘心交易
放咗學之後嘅佢，從眼神、笑容中所散發嘅，係淡淡嘅難受，有苦說不出…
「點解你咁急要錢？」凌御生忍唔住問咗出口
夏巧莘愣了一愣，但好快又微微笑
「遲啲話你知。」夏巧莘耷低頭講道




「今晚番唔番工呀？」凌御生轉移話題，夏巧莘微微點頭
夏巧莘一直耷低頭行，聽到身邊嘅人都喺度竊竊私語，啲人竊竊私語係因為凌御生
凌御生見到夏巧莘一直耷低頭，覺得夏巧莘感覺唔自在
「你行先啦～」凌御生開口道，豈料夏巧莘有啲愕然咁望住佢
「唔洗呀…」夏巧莘微微一笑
「你行先啦！你同我行埋一齊唔自在，我自己知自己事。」凌御生一臉毫不介意咁講
「咁…我行先啦…」夏巧莘有啲唔好意思咁笑咗一笑，然後就先行一步
…
上堂嘅時候，夏巧莘一直望住窗出面發呆，冇專心聽書
「哎呀，我唔記得咗拎疊功課簿上嚟比大家添…」中文老師尷尬咁笑起嚟，老師望向夏巧莘，「巧莘，可唔可以落去幫我拎疊簿上嚟？」




發緊呆嘅夏巧莘當然聽唔到老師叫佢啦，佢仍然望住窗外放空
夏巧莘望住出面，諗起今朝早番學嘅事
「我係咪顯得好唔想同佢一齊行…？」夏巧莘心諗，「其實我又冇特別抗拒…」
對夏巧莘而言，其實喺答應咗交易之後，真係冇特別介意要同凌御生一齊行
只不過係啱啱諗緊家事，所以先耷低咗頭啫，但係凌御生就誤會咗佢，以為佢介意同佢一齊行
「巧莘？」坐喺夏巧莘前面嗰個女仔伸手到佢面前晃了晃
「係！」夏巧莘回神過嚟，見到大家都望住佢
老師同其他同學都一臉驚訝，夏巧莘竟然會喺上堂嘅時候發呆
「巧莘，你可唔可以上去教員室簿櫃拎番你地班嘅功課簿落嚟呀？」老師微笑道，「你宜家上去拎，慢慢啦唔洗急，仲有1分鐘就放小息啦都。」
「哦…可以呀～」夏巧莘微微一笑，同時又有啲尷尬咁企起身，「對唔住呀，我宜家就上去拎…」
夏巧莘離開咗課室，佢自己都有啲意外自己竟然會喺上堂時間發呆了
佢行上樓梯，準備由3樓行到上5樓嘅教員室簿櫃拎簿
當夏巧莘行到上5樓，喺老師簿櫃中拎咗疊簿嘅同時，小息嘅鐘聲剛好就響起
佢將疊功課簿抱喺懷中，心諗反正都已經小息，就唔番課室住啦～
夏巧莘抱住疊功課簿行到上7樓，再轉上8樓，上到8樓之後推開個鐵門，到咗學校嘅天台




喺天台嘅鐵絲網前放咗3張長木櫈，3張長櫈之間都隔咗一段距離
當夏巧莘上到嚟嘅時候，就已經有人坐咗喺左邊嘅嗰張長櫈上

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link