讀足六年，比人蝦足六年: 8.紀少婷
8.紀少婷
『啊...係呢...你最近點啊？』因為阿婷話我有咩問題都可以搵佢，我唔想孤獨咁食飯，所以就叫埋佢，咁啱阿琪今日要去幫校園電視台錄音，所以唔得閒同佢食飯，所以嚴格黎講佢都係食自己咋。
『啱啱小息先見完咋，問咩姐你？你係咪真係唔識同人傾計啊？同埋我本來都唔想同你食，如果唔係阿琪放我飛機...我又應承左你條契弟可以搵我...』佢睇落好唔情願，但係已經冇辦法，因為佢已經同我坐左係大家樂。
你問我點解會同個靚女黎食大家樂？因為我地學校附近都冇咩好西食，所以食大家樂都係唔錯嘅選擇，加上我又冇咩錢...
更何況我地都係普通朋友食飯姐，唔洗食咁好嘅，係咪先？係囉係囉。
『其實我發現我地都唔係好熟，點解要我同你出黎食飯喎？』阿婷聽落好認真咁問。
『哦...咁係你話有咩搵你架嘛...』雖然個解釋就唔係咁好，但係第一，呢個係事實，第二，唔通我話我因為冇friend所以搵佢咩？咁咪好似我係借佢過橋？雖然都係事實...
『係就係姐，但係你其他班冇friend架咩？點解要搵我食姐？』屌，唔撚洗咁勁一矢中的啊嘛。
『係啊...其實我坦白d同你講啊...我真係一個friend都冇架...』唉...冇計，我就係咁孤獨架啦，唔洗可憐我架。
『sorry 囉，我點知你真係一個friend都冇嘅姐。不過你份人又冇咩優點，溝通又咁屎，好難有人想同你friend架喎。』仆你個街！真係唔可憐下我架喎！不過你又講得冇錯嘅...
『咁你又啱嘅...』屌，我都唔撚知要講咩好...
『咁你又唔洗咁灰喎...你唔係同阿琪好friend架咩？』下？點解你會覺得我同阿琪好friend啊？其實某程度黎講，我都覺得我同佢幾friend嘅，但係佢係我心入面嘅地位就唔只friend咁簡單，唔知佢點諗呢...
『哦...不過問人就講自己先，你呢？我想知多d...你嘅野...』我真係鼓起左好大嘅勇氣講，你知我平時同其他人講野都怕怕羞羞咁架啦，今次仲要係靚女喎。
『我啊？你有咩想知啊？』
『咁你都識講...我同你唔係好熟啦...咁你比我了解你多d...咪friend d囉...』
『我好想同你friend咩而家？』...唉！屌你咩！又講呢d。
『唉...算啦，就講少少比你聽啦，少少咋。』佢又突然轉軩。
×××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××××
紀少婷視角
我自細就同爸爸媽媽仲有婆婆一齊住，我公公同爺爺麻麻係我未出世之前就走左，我屋企雖然唔係好有錢，但都算係小康之家嘅，所以我都叫做要咩有咩啦，但係你以為我係果d咩大小姐啊？
我又偏偏唔係d咁嘅人，我都算節儉，又唔算話好貪戀物質，所以都冇咩點扭計話要咩要咩之類，過得平平凡凡就得架啦。
而問題就黎啦，因為我地經濟幾好，所以錢根本就唔係d咩問題。
我媽媽就成日都幫我報好多興趣班，佢好想我做一個多才多藝嘅人，應該話佢好執著，一定要我做一個多才多藝嘅人。
『婷婷，去補習啦！』
『婷婷，你唔記得左今日要去學琴啊？』
『婷婷，行啦！趕時間去學游水。』
因為媽媽成日幫我報呢樣，報果樣，所以我自細其實都冇咩時間同其他朋友玩。
但係呢，我自細就十項全能。（雖然咁講好似好自大）
『阿婷啊...我呢...我好鍾意你啊！』同我講呢句嘅係一個同我幾friend嘅男性朋友，估唔到最尾都係咁...又搞到friend都冇得做...
『算啦...我對你跟本冇feel...』我知道我咁講之後，我地就會邊翻做陌路人，但係冇計，因為佢本身都有女朋友，我唔可以咁過分，破壞人地幸福...
因為我本身個樣都自問都唔差，加上我多才多藝、十項全能，所以好受男同學歡迎。
問題就黎啦...
『又想勾仔啊？』
『車！以為自己有少少本錢就周圍收兵溝仔。』
『八婆！就係你勾引我男朋友！』
唉...因為我太受男仔歡迎，等價交換...我係好唔受女仔歡迎架...
但係其實我都想要朋友，男仔好多接近我身邊都係為左想溝我，而女仔就因為覺得我溝曬d男仔，所以疏遠我...
搞到我一個friend都冇...
就咁，過左初中...
直到佢出現...
『Hi...你好似叫紀少婷啊？我叫劉憶琪啊！你叫我阿琪啊！』從佢嘅眼中可以感受到一絲絲嘅溫柔。
『哦...你好啊！你叫我阿婷就得啦...』你唔知佢地點講我咩？仲過黎同我傾計？唔驚會比人排擠咩？
『叫阿婷都唔親切嘅，就叫你婷婷啦！』
『哈哈！我啊媽都係咁叫我架，咁啊...我叫你琪琪啦！』
就係咁，我地就成為左形影不離嘅好閨蜜啦。
我心入面好感激琪琪架，佢唔介意人地點睇我，都願意同我做朋友。
好多謝你...我永遠都會係你嘅好閨蜜架！
××××××××××××××××××××××××××××××××××××××××××××××××××××××××××××××××××××××××××××××××××××××××××××××
『哇...原來你係咁識阿琪架...咪住先！姐係你都冇咩friend姐！仲笑我！』屌，搞到我咁自卑！
『咩啊...有一個好過你冇啦！』咁你又錯唔曬...
我地邊傾邊食，就咁過左一個午膳。
我都知道左關於阿婷嘅野。
原來佢地係咁識嘅...真係意想不到，仲以為靚女一定好多friend添...
不過都好...叫做同病相憐...哈哈。
唔知我可唔可以做你第二個朋友呢？