讀足六年，比人蝦足六年: 7.復活
7.復活
唉...最近都仲係咩進展都冇。
佢地係上次旅行日之後，依然係冇咩點理過我，除左個矮仔之外，佢最近係咁問我關於個靚女嘅野。
屌你媽假惺惺，咪又係想溝女，不過量你個短人都溝唔到。
不過呢...
上次件事都仲係令我耿耿於懷，到底佢點解要無端端幫我呢？
唔通係阿琪叫佢幫我？阿琪一向知我比人蝦都唔會出聲，所以係阿琪叫佢幫我都唔出奇，加上佢地又咁friend。
但係...
阿琪應該嬲左我架...有咩理由會幫我呢...
更何況佢由頭到尾我冇鍾意過我...
就算見到我比人蝦...佢都冇必要幫我。
咁可能...係我諗多左...應該同阿琪無關。
咁唔通真係個女仔想幫我？
個日見到佢鬧人個表情同語氣都唔似係玩，應該係真心嘅。
咁就奇怪，點解佢要幫我呢？
應該話，到底有咩驅使佢去幫我呢？一個人鬧一班人，佢係玩都未必會攞呢樣玩啦，容咩易同我一樣比人蝦啊？雖然靚女就唔同講法，但係唔係靚女就大曬架嘛。
應該...
『喂！諗咩諗到咁入神先？』又係個討厭嘅短人。
『點啊？你又想問咩啊？唔好咁虛偽啦你。』唉屌！應酬真係辛苦，仲要係自己嘅仇人。
『哦，冇嘅...我想問佢平時有咩嗜好姐？』屌，終於入正題啦。
不過我都唔識佢，你問我托咩？
『其實我同佢唔係太熟。』唯有咁樣hea住條on9矮仔先。
『扮咩啊你，唔熟佢上次係沙灘就唔會幫你出頭啦。』咁講起上黎又係，但係我都唔知點解架，我冇呃你架，真係唔熟喎。
『答你唔到。』屌，我又不自覺開始扮cool。
『屌，問你都曬9氣，都唔知點解佢會咁幫你，係都過黎搵我傾計啦。』喂大佬，雖然我知道自己唔係好掂，但係你個樣都唔好得去邊啊，又矮喎...唉算啦，唔好人身攻擊。
睇黎，我都真係要問個機會去多謝佢先得，仲有，我都未知佢叫咩名...
雖然我知道自己嘅資質呢，未必溝到佢架啦，但係都叫講左多謝，過到自己嘅良心。
『喂！做咩係度啊你？』
『咁啱嘅，係度做咩啊？』
『上次多謝喎。』
『其實你叫咩名姐？上次點解要幫我？』
我個腦不斷重複呢d對白，雖然好例牌，但係我又唔識點同女仔溝通，唯有照用呢d對白啦。
講下講下，我就見到佢係A班出左黎，但係就冇同阿琪一齊。
死火！佢好似見到我好唔自然咁等人，點搞呢？
『係你條爛攤？係度做咩啊？』又係佢主動開聲。
『哦...冇...睇下...睇下風...風景姐。』屌，我講野又一舊舊。
『扮咩啊？黎搵阿琪？』我應該點同你講我係黎搵你架呢？
『哦...唔...唔係啊。』頂，唔好疾下疾下咁啦。
『唔係？』佢好似好懷疑咁。
『真係唔係？』佢又問多次。
『真係唔係啊...』太好啦，講野終於正常翻小小。
『咁你黎做咩啊？古古怪怪咁...』屌！！！我唔知點開口好！！
『冇...諗住搵你姐...』我鼓起勇氣講出口。
『下？搵我？搵我做咩啊？』
『多謝你...上次係沙灘幫左我...』
『哈哈哈哈哈....』佢無端端係度笑。
『就係咁咋？』
『係啊...』就係咁？你知唔知我用左幾大勇氣先講得出口？
『屌！你咁廢！幫得你幾多次啊？』連你都咁講我...
『咁你又唔洗多謝，助人為快樂之本啊嘛，不過你比人蝦真係要出聲。』
『我都想啊...但係我又冇你咁大膽喎...我驚佢地知道會越黎越過分姐...』
『下...咁冇人幫到你架喎。』
『算啦...我都冇諗過要人幫...』
『唉屌，你又黎啦，你咁點保護自己啊？你係咪男人黎架？冇社交能力都算啦，保護自己嘅能力都冇，唔怪得阿琪...』佢突然冇講落去，唔知係咪意識到自己講錯野。
『對唔住啊，口快快。』佢睇落有d內疚咁同我道歉。
『唔...唔洗啦，你又唔係有心嘅，何況...我又唔係佢邊個...』我同阿琪的確咩關係都冇...你講得冇錯架。
『點都好啦，你以後有咩事就搵我啦。』下...真架？
『咩話...你...講真架？』
『呃你做咩姐？』佢講完就諗住轉身走。
我突然先記起，我有d野未問，係咩呢...
啊！
係佢個名啊！
『等陣！』我咁大個仔都未試過咁堅定咁講野，除左對住阿琪...
『咩啊？』我發現走廊有d人都望住我...好尷尬。
『我未問...你叫咩名啊？』
『哦...屌！以為d咩重要野tim...關你咩事姐？』唔係掛？唔同我連問你個名嘅資格都冇？
『講笑姐，我叫紀少婷啊，傻仔。』
終於...終於問到你個名啦。
但係...呢種感覺好奇怪...我明明係鍾意阿琪...點解我會對佢咁好奇呢？
可能你會話我狗公，見到女都好奇架啦，更何況仲要係靚女。
但係我可以肯定咁同你講，唔係因為佢靚女，雖然我唔否認佢真係幾正。
係因為佢比我嘅感覺好特別...就好似當初阿琪幫左我個陣一樣。
唔通呢個就係戀愛嘅感覺？
好特別。
啊媽，我復活啦！！