讀足六年，比人蝦足六年: 9.教畜們的究極圍攻
9.教畜們的究極圍攻
作者的話：因為呢...中4寫落去會好怪，加上我墨水用得7788，所以我會改時間線，旅行日開始會變做中5，而唔再係之前嘅中4，而第二三集就係冇變，都係中4，雖然二三集有講臨子廷好期待旅行日，但係大家可以想像係中4嘅旅行日，而非中5，不過中4、5嘅旅行日都有足球環節。之後?故事會接住繼續係中5，唔太影響故事發展，所以希望大家都唔好太介意啦。
『哇屌！好彩趕得切...』我跑到喘曬氣，終於翻到學校...冇計，我平時又唔會做運動，趕到算唔錯架啦。
事關....
『喂！搞咩啊司機大佬！唔開車？』一個中年火爆嘅男人大大聲咁喝個巴士司機。
『我都唔想架！你見唔到有人係前面打交咩？』個司機都好無奈，我見佢個神情好似已經想屌7個男人咁。
『打咩交啊？慌唔係d傻西炒車傾賠償咩。』你咁肯定？
講完，個男人即刻落左車，應該係落車睇下咩環境。
雖然我怕翻學會遲到，但係搞成咁，好大機會都遲架啦，更何況部車開唔到就開唔到架啦，我係部車都冇用。
所以我就膽粗粗咁落左車去圍觀，做個稱職嘅花生友。（ps而家係中五）
點知呢...
一落車，就見到勁多人圍觀，我屌！原來花生唔係話想食就食到架...
我好努力咁逼去人群嘅最前面，就係為左睇下咩人打交搞到巴士都開唔到...順便偷偷地鬧佢地搞到我遲到...
行埋去，我就feel到唔對路...正常人係條行車路度打交，一早比人屌左老母兼拖上行人路圍姦啦，點會仲打緊呢？除非...
果然冇錯，冇人咁出聲鬧佢地，個個都剩係得個睇字，有d就拍埋片tim...
點解冇人出聲？
因為個兩條友有槍啊！雖然佢地冇開，但係一開可能就one short one kill，邊個夠膽出聲？
但係班友又真係痴線，有槍都仲睇？一定係工作壓力大，搞到個個傻Q曬...唉...香港人真係幸苦...
佢地兩個發現越來越多人圍觀，就散左水，最後，條路又通翻。
『喂！你個仆街浪費曬我d時間！』原來係架巴士同個司機嘈嘅中年男人大叫。
啱啱打完交嘅面具男睇左佢一眼...
『Force做野唔洗你教...我勸你唔好多嘴。』咩Force啊？
雖然唔知咩事，場鬧劇就咁完結左，亦都有警察黎了解情況（現實就唔係咁講）。
我就九秒九上翻部巴士，然後就等開車翻學...就咁浪費左半粒鐘...
好彩我今日早出門口姐，如果唔係咪死得？
我一落車就狂奔翻學校。
依....果個咪....阿婷？
我落車後見到阿婷都跑緊翻學校，我就加快小小咁過去搵佢。
『咁啱嘅？』我邊跑邊講。
『未見過人遲到咩？』佢又覆我。
『唔係...』
『哈哈哈...你跑姿好好笑啊！』咩話？！又笑9我？
雖然我有自知之明，我d同學都成日笑我跑到成個奇行種咁樣，但係我冇諗過阿婷都會笑9我姐...
我地邊跑邊講，就翻到學校啦...
但係呢...
我見到訓導主任啊！！！係訓導主任啊！！！
屌！！！仆街啦今次！
我同阿婷一齊跑翻去，點知阿婷快小小。
佢啱啱好準時跑到入學校，係真係啱啱好遲一秒都出事個隻。
我就冇咁好彩啦...咁啱遲左一秒，但係訓導都會當我遲到...
『跟我過黎！』訓導大大聲咁喝9我。
冇計啦...鬼知佢咁得閒攞住個stop watch企係學校門口計時咩？
最後，佢叫左我去訓導室等佢，之後仲叫埋我班主任落黎...
『點解你遲到啊？答我啊！』訓導主任對撚住我塊面咆哮。
『哦...啱啱條路有意外塞車啊...所以遲左少少...』真架屌你...我特登遲到嘅咩？我有冇咁無聊啊？係咪都要翻架啦...比人蝦左咁多年我冇退學算對得住你啦...
『遲咁多仲搵藉口！唔識早d出門口架咩？』咩遲咁多？我遲一秒咋喎！屌你媽！你對多嘅定義係咩啊？仲有，我鬼知無端端會有兩條友係條街度打交仲要有槍咁痴線先得架，點早d出門口啊！我識預知未來咩...唔係我今日早左出門口，點止遲咁少啊？
『黃sir啊...你唔洗同佢講咁多架！罰就得架啦！我會聯絡佢家長。』唔撚係掛？第一次遲到你罰Q我都算啦！仲要問候老母？仲有我都唔係遲好多姐。
當然訓導係冇停止過鬧我架，然後個仆街劉XX仲打撚埋比我阿媽阿爸，叫佢地一齊黎學校見家長，仲要係即日！！
最尾，中文科老師、班主任加訓導主任一齊見我家長，你問關中文科咩事？我都唔撚知，我有得罪過佢咩？
不過你問我，在坐三位老師有咩共通點呢？我就可以肯定咁同你講，佢地三個都係仆街死教畜！！
佢地一人一句，狂插我！插到我咩都講唔到，我阿爸阿媽又周不時都插我一兩句，真係唔知咩料，睇黎今晚翻去有排解釋...
我都唔知點解？同學蝦我，我都可以忍，鬼叫我唔討好佢地。
但係老師呢？冇幫過我出頭都算啦！仲要蝦埋一份！老師嘅職責唔係教導同開解學生嘅咩？
帶頭排一個學生？你地良心過意得去咩？
真正嘅教畜，唔係教得唔好，因為教得唔好係技術問題，有得改。
但係性格，係冇得改。
再講多次。
仆街啦你班死教畜！！！！！！！