人要惡過車！: 八十一

叮噹～

「歡迎～」

迎接我哋嘅係一個廿歲出頭嘅女性，深啡長卷髮兼化行重妝，着條黑色連身短裙，外表同馮盈盈有幾分相似嘅，身材嘅話，只可以話應大則大，應細則細囉。

但哩個女仔竟然俾我想像中有禮貌，我仲以為會係啲幾寸嘅女仔添。

「Hi Fiona。」我一眼就睇得出堯姐只係俾面咁笑下。





「Hi～哩位就係你男朋友？」

「係呀。」

「Hi 我係Fiona。」佢自信滿滿咁打招呼。

「Hi。」

屋入面成班MK仔MK妹，一邊劈酒，一邊打機，仲要有幾個出咗露台度食煙，至於係香煙定電子煙呢，我就見唔到嚕。





我本身對於食煙哩種行為不但無好感，甚至乎可以話討厭，所以我應該慶幸自己屋企無人食煙。

「咦，堯堯你哋嚟咗嗱。」

Jenny拎住杯紅酒，塊面紅曬咁行過嚟。

「JenJen～ 嘩，你又飲酒呀？」

「你掂唔掂㗎？」我多口問句。





「挑！阿姐我飲酒嗰陣，𡃁仔你都未出世呀。」

OK，佢擺到明已經醉咗。

「Chris呢？佢唔係黐住你㗎咩？」

「細佬？唔知佢喎，佢好似話去咩石乜嘢。」

「石澳？」

「係呀係呀，就係石乜嘢呀。」

依家入石澳？石澳唔係去Morning Drive㗎咩？

「JenJen不如你去嗰邊坐低先啦。」





堯姐帶咗Jenny去餐枱度坐，而餐枱坐咗一對同我哋一樣融入唔到MK世界嘅情侶。

與此同時，Fiona喺樓梯落返嚟，行去班MK仔MK妹度。

「嘩～你打機咁叻嘅～」Chok聲Chok到台妹撒嬌咁係咩玩法。

「咁有無咩獎勵先～？」金毛MK仔A，以下簡稱金毛A唔安分嘅手放咗喺Fiona大脾上面。

果然係狗公呢⋯⋯

「咁好啦～」講完Fiona就一嘢鍚咗金毛A塊面一啖。

～ ～ ～





「夠未先～？」

「唔係好夠喎～」金毛A喺度淫笑⋯⋯

「咁貪心呀？」

喺個咁嘅環境底下，我都唔想再留落去，所以坐多陣就借送Jenny姐返屋企為理由，離開哩場鬧劇。