人要惡過車！: 第七十六章

因為約咗喺元朗嗰邊嘅茶樓飲茶，所以我同阿爸分別揸住架FD2同RR出發去元朗，而當然阿媽係跟阿爸車。

正當我哋去到Yoho Mall搵緊位泊車嘅時候，周圍望下邊度有位。咦，嗰個人咁似堯姐嘅，望真啲仲有Uncle Auntie，睇嚟啱啱佢哋泊好車喎，等我揸過去打聲招呼先。

由於佢哋泊咗喺架七人車隔離，本身我都見唔到佢地揸咩車，點知揸到過去係一架令人意想不到嘅車。

「Uncle Auntie早晨。」

「早晨呀。」Auntie面露笑容咁講。





「FD2，識玩喎。」唔洗多講，哩句係出自Uncle口出。

「Uncle你部DB8都好靚呀。」

「誒，幾廿年舊車嚟啫。咦，唔見你嗲哋媽咪嘅？」Auntie喺度講。

「佢哋兜咗去另一邊搵位。」

「哦～咁我哋攞位先，一陣間茶樓見啦。」





「好。」

估唔到Uncle長期唔喺香港，都仲留咗架車喺香港，仲要係望落咁原裝、咁直版嘅白色DB8R。

。

。

。





泊好車就啱啱好收到堯姐嘅Whatsapp，話佢哋已經搵到位，叫我哋唔洗急。

見到面一坐低就係一連串嘅客套説話，但傾多陣就開始熟，變得無咁拘謹。

喺班女人不斷傾買衫、化妝、護膚產品之類嘅嘢嗰陣，三個男人嘅話題自然離不開車。

「係喎，僖仔眼光好好喎，揀咗FD2。」Uncle首先打開話匣子。

「哈哈，邊係呢。」

「係呢，咁光哥你係揸咩車㗎？」

「我？我都係揸FD2喳嘛，咁華哥你呢？」

「我揸DB8㗎，當年98年新車水貨Keep到依家。」





「咩色DB8？」阿爸略有所思。

「都係冠軍白。」我搶先答。

「多口問一句，你係林錦公路嗰部DB8？」

「誒，嗰啲陳年往事嚟嚕。」Uncle好似好驚訝咁。

「嗰陣我都想搵你玩返兩場，點知未搵到你已經唔見埋。」

「係咩，咁你以前揸咩車呀？」Uncle好開心遇到個傾往事嘅人。

「我嗰陣係揸白色四門大踢EK。」





「莫非係屯公最快嗰部大踢？」

「啲人搞笑先起個咁嘅朵喳嘛。係喎，當年你消聲匿跡之後去咗邊？」

「無呀，都係忙住賺錢，無時間玩車。之後大咗又周圍同老婆去旅行，好少返嚟香港。」

「咁架車咪好耐無着，洗唔洗大執？」

「我舅仔每個禮拜會幫我着下車，喺停車場附近兜下圈咁。」

估唔到佢兩個好似一見如故咁，越傾越開心，成餐茶就喺度傾以前飛車啲往事，而我亦都聽得好高興。