人要惡過車！: 第七十五章

星期六嘅中午，我揸住架Vellfire同堯姐一齊向機場出發。

泊低架車，我同堯姐喺一號客運大樓接機大堂附近間M記食少少嘢，順便坐低抖下。

「媽咪啱啱Whatsapp話佢地等緊拎行李，好快出到嚟。」

「哦，好。」

過多無幾耐，我哋就接咗Uncle Auntie，當然少不免攬下同傾計，就係咁我哋邊行邊傾返停車場攞車。





喺車緊佢哋返去嘅途中，Auntie突然問咗句⋯⋯

「阿僖呀？」

「係。」

「你同你嗲哋媽咪聽日得唔得閒呀，不如一齊出嚟飲餐茶？」

「咁我一陣打電話問吓佢兩個啦。」





「誒，我打咪得囉。」坐喺我身邊嘅堯姐拎咗我夾喺手機架嘅電話，打比我阿媽。

。

。

。

「喂，Auntie？」





「無呀，我嗲哋媽咪想問下你同Uncle聽日得唔得閒一齊飲餐茶。」

「好呀好呀，一於咁話啦。」講完之後堯就收線。

「嘻，佢哋無問題呀。」

「咁就好啦。」

。

。

。

「係喎，你上次唔係揸Freed㗎咩？換咗Vellfire嘅？」我隱約從倒後鏡見到Uncle皺眉頭。





「架Freed係我爸爸嘅，不過佢換返私家車，而我嗰架又係私家車，為咗方便啲我先會借人哋架七人車。」

「咩牌子嘅私家車？」Uncle繼續追問。

「都係本田。」

「哦～本田啲車係好車嚟。」Uncle露出一個欣慰嘅微笑。

。

車咗Uncle Auntie返佢地元朗嘅屋企，我就揸返架車還比村民，順便請佢飲嘢以示謝意。