人要惡過車！: 第四十九章

之後嗰幾日都係返學放學嗰啲日常生活啦。

另外約咗威、皓、Ken星期六出嚟食個飯。

仲有喺ig follow咗上次油店嘅Jacky兄，有吹下水咁。

咁星期五晚堯去咗同朋友食飯，我就得閒無嘢做，遊下車河咁。

一個人揸咗架車去黃金海岸，泊低周圍行下，橫掂堯未打電話叫我車佢。





行返停車場，附近泊咗一架黑色RZ版FD3S ，同一架黃色Mazdaspeed嘅FD3S。而兩架車個司機都應該係大我少少嘅後生仔，我行返架車嗰陣，佢哋行咗過嚟。

「師兄架車幾靚喎。」其中一個話。

「你哋架7仔都好靚呀。」

「哈哈，個樣係真係唔差㗎。」

之後我哋喺度傾咗陣計。





「有冇興趣加入我哋Whatsapp Group呀？可以一齊出下車喎。」

「哇，我FD2邊夠你哋快呀。」

「又唔係鬥快，我哋group仲有人揸其他車㗎，唔洗驚追唔到喎。」

「啱呀，可以喺group到傾下車經咁。」

「咁呀，好啦。」





「係喎都未介紹自己，我叫阿Ben，揸黑色Rx7。佢係Hugo，揸黃色Rx7。」

「我叫阿僖。」

「哦～好啦下次再講啦，bye」Ben話。

之後我就返上車，無幾耐就收到堯電話。

「喂，你一陣間得唔得閒出嚟車我呀？」

「Ok呀，你喺邊度？」

「我依家喺APM。」

「好啦，一陣見啦。」





睇嚟堯都係無咁快，我慢慢行下路出到荃灣先上公路。

之後嘅呈翔道、龍翔道、觀塘道都係安全車速行。

去到牛頭角，堯就打嚟。

「喂，我哋準備走啦，你去到邊？」

「我就到啦，你落樓下上落客區等一等啦。」

「好啦，bye」

直行落到地鐵站迴旋處調頭，去到時間啱啱好。





除咗堯之外，仲有兩個女仔，樣就普普通通咁啦。

「唔該你呀B」堯上車話。

我笑一笑。

「你就好啦堯姐，有老公接送。」其中一個女仔話。

「邊係喎。」堯雖然咁講，但係喺度甜笑。

「係呢，兩位係喺邊到落車呢？」我問。

「我哋喺市中心落就ok啦，唔該曬。」

「ok。」





去到黃大仙，我打死火燈停埋一二邊。

「係咪架車有咩問題？」其中一個女仔問。

「Shh，唔係呀。」我指一指身邊嘅堯。

堯個傻女已經訓着咗，我除咗件褸披喺堯到，順便較細啲個冷氣。

「堯識到你真係好。」另外嗰個女仔話。

而我都係一笑置之。

車住咁多人廢事亂咁飛，安全揸返去就算。





我兜一兜入市中心比兩個女仔落，再揸返屋企。

泊好車，堯終於醒。

「唔？返到嚟啦。」

「係呀，成程車都訓到死豬咁。」

「哼！話我豬，我唔理你呀。」

「係啦公主，返上去訓啦。」

「好啦，嘻嘻。」