人要惡過車！: 第五十章

星期六我十點起身。

「起身啦。」

「⋯⋯」我無出聲。

「快啲啦。」

「做咩呀？」





「刷牙換衫。」

我做齊曬堯所講嘅嘢。

「咁可以講發生咩事未？」

「無呀，舅母叫我幫表妹溫書，之後咪叫埋你。」

「吓？哦。」





之後揸車過去堯嘅舅母度，好彩唔係好遠，喺天水圍。

叮噹。

「嚟咗啦。」

「舅父。」

「咦，哩位一定係阿僖啦。」





「Hi。」

「舅父你又知嘅？」

「家姐同咗我講啦。」

「堯姐姐。」有個細路女衝出嚟攬住堯。

「蕎蕎今日乖唔乖呀？」

「乖。」

蕎蕎望到我，露出一個好奇嘅表情。

「僖仔你嚇親蕎蕎？」堯話。





「吓？我無呀。」

「蕎蕎叫人啦。 」堯嘅舅父話。

「僖仔。」

「Hi」我笑。

「噗～嘻嘻」堯偷笑。

「笑咩？」

「無呀，僖～仔～嘻嘻。」





我反一反白眼，無堯咁好氣。

「蕎蕎星期一考咩呀？」

「數學。」蕎蕎喺書包攞咗本小一數學書出嚟。

「交比你啦。」堯拍一拍我膊頭。

「哦。」

咁小一都係啲加法，加上蕎蕎理解力高，簡直係輕輕鬆鬆。

「僖仔，我想食雪糕。」蕎蕎話。

「做埋哩一題，我哋去買雪糕。」





「好嘢。」

蕎蕎做曬啲練習題，而我都係時候兌現承諾。

「蕎蕎好叻女喎，去叫埋姐姐買雪糕啦。」

「堯姐姐，去買雪糕。」

「好啦。舅父，我哋同蕎蕎去買雪糕。」

「哦。」

就係咁，堯拖住蕎蕎，蕎蕎再拖住我，行去銀座。





行到去銀座，咁啱撞到May哥同Chloe。

「嘩，一家人嚟行街呀？」May哥話。

「乜嘢呀？」我話。

「兩夫婦拖住個女，仲唔係一家人？」Chloe話。

「哩個我個表妹嚟㗎。」堯話。

「咁你哋咁得閒行街嘅？」我問。

「佢啱啱教完波嘛。」Chloe指一指May哥。

「僖仔，去買雪糕啦。」蕎蕎拉住我。

「好啦，下次見啦。」我同May哥講。

「好啦ByeBye。」

之後我哋行咗去買雪糕，買到之後蕎蕎即刻喺度食。

「嘩，做咩食到成面係呀？」堯拎張紙巾幫蕎蕎抹。

堯第時一定係一個好媽媽啫，如果我有個女會點呢？

「諗緊咩呀你？」

「喂，喂。」

「吓，做咩呀？」

「諗咩諗到咁入神呀？」

「無呀。」

「鬼鬼祟祟，好快啲講啦喎。」堯撓住我條頸。

「講。」蕎蕎攬住我隻腳。

「係啦係啦，我覺得姐姐一定會成為一個好媽媽啫。」我蹲低同蕎蕎講。

蕎蕎抓抓頭，應該唔明我講咩。

「喂你無啦啦亂講啲咩呀？」堯面紅紅。

「唔係咩？」我對住堯笑咗一笑。

「無你咁好氣呀，我哋返去啦。」

「嗯。」蕎蕎點點頭。

「嘻嘻。」

「擺明又喺度偷笑啦。」我細細聲同自己講。