人要惡過車！: 第三十五章

「係喎，我哋今日幾多人行？」我問。

幾多人行哩個gag係來自 三人行 必有我師焉 。

「十五人行。」May哥答。

「必無哈帝斯。」銓哥大笑。

哈帝斯都係我哋中學同學，膠人一個，畢咗業之後無咗影。





「係喎，佢去咗邊？」

「去咗吊頸？」阿威恥笑。

想當年大佢兩年嘅女朋友去台灣留學，飛咗佢，佢竟然想以死相迫，結果比我哋恥笑佢。

「唔好咁衰啦。」村民話。

「道德撚全面進場。」阿皓話。





「佢好似去咗台灣喎。」銓哥話。

「追返條女呀？」阿Ken話。

「是咪路呀？」May哥話。

「好似真係呀。」銓哥話。

「佢真係膠㗎喎。」





「你第一日識佢咩？」村民話。

「唔係。」我大笑。

「幾點呀家陣？」村民問。

「十一點幾㗎喇。」阿Ken答。

「是喎，我聽朝仲要帶比賽。」May哥話。

May哥佢除左要返學讀書，仲係一個排球助教。

「咁不如散band？」我問。

「睇嚟班女人唔係咁諗喎。」村民指指班女人。





「老規矩，包剪揼，輸咗做死士。」銓哥話。

猜之前，我哋打曬眼色，做鳩May哥。我哋全部出剪，得May哥出包。

「仆街。」

「請。」

「睇你表演。」

「一路好走啦。」我哋全部人向住May哥揮手。

May哥行過去班女仔度。





「err…都好夜啦…er…我聽日要帶隊…er…不如散band啦。」

「吓！」Chloe睥住May哥。

「…」May哥唔出聲。

「係囉，都好夜啦，下次再傾過啦。」雅姐話。

「啱呀。」阿兒話。

「咁好啦。」Chloe話。

之後我哋埋單，去停車場攞車。

村民哩啲成熟嘅男人，梗係揸Vellfire。





銓哥就揸Lotus Elise，我佩服佢揸啲咁hardcore嘅車。

但最估唔到係May哥，佢揸Yamaha R1M。

「架車你㗎？」我問。

「係呀，正唔正？」May哥話。

「型啦，溝死女啦。」

「收皮啦。」

喺我哋仲行緊去停車場嗰陣，佢已經唔知同Chloe飛咗去邊。