人要惡過車！: 第三十六章

咁之後嗰幾個禮拜都係過啲日常生活。喺某一日嘅下午，我同堯食緊Lunch。

「係喎，嗲地媽咪下個禮拜返嚟香港呀。」

「哦～係呀。」

「咁你識做啦。」堯講笑咁講。

「吓？」





「到時同我一齊接機啦。」

「哦～好呀。」

又繼續過咗幾日嘅無聊生活。

「阿爸，後日借一借架車嚟呀。」

「做乜無啦啦借我架車？你有車㗎喎。」阿爸好奇咁講。





「嗰日接阿堯屋企人機，我諗揸7人車方便啲。」

「哦～咁我揸你架車返工啦。」

「ok呀。」

到接機嗰日，我訓到自然醒，大概中午12點，阿堯喺度睇緊電話。

「早晨，呀～」我打咗個喊露。





「仲早晨？夠鐘食晝啦。」堯笑咗笑。

「係咩？」

「好啦，沖個涼先啦，之後去食飯。」

「嗯。」

我起身沖涼洗頭，刷牙洗面，換衫着鞋。

「今日食咩好呢？」我自言自語。

「一係Euro GoGo？」堯話。

「又好啫。」





我泊低架車喺屯市，同堯一齊行去Euro GoGo。我哋叫咗兩碟意粉同埋一碟雞翼分嚟食。

「係喎，你屋企人幾點機？」

「今晚6點7點度，所以唔洗急呀。」

「嗯。」

食完嘢同堯行咗陣街，睇吓衫，睇吓鞋，行到差唔多夠鐘就入機場，入到機場泊好車，等堯嘅屋企人。

無幾耐之後，佢哋就喺禁區出嚟。

「嗲地媽咪。」堯攬住Auntie。





「乖女。咦，哩位係？」Auntie問。

「Hello。」

「哩個係阿僖呀，我男朋友。」堯笑住話。

「好嘢喎𡃁仔，頂得順哩個女。」Uncle無啦啦爆句咁嘅嘢出嚟。

「er…」一時之間我都唔知點應。

「唔好亂講嘢啦老公。」Auntie白Uncle一眼。

「哈哈哈哈，我講吓笑啫。」Uncle笑。

「好啦，去攞車啦。」堯話。





我哋行返去停車場，起程返新界。

「我哋去咗旅行，屋企得返你一個，一定好悶啦？」Auntie問堯。

「唔會呀，有哩個傻仔陪我㗎嘛。」堯喺度笑。

「咁佢都無可能廿四小時陪住你㗎？」Uncle話。

「所以我去咗阿僖度訓，咁佢咪走唔出我手指罅。」堯話。

「咁你都得呀哈哈，有無麻煩到人哋屋企人呀？」Auntie問。

「無呀，阿僖屋企人對我好好㗎。係呢，你哋今次留喺香港幾耐呀？」





「個零兩個禮拜到啦，之後應該再去其他國家玩。」Auntie話。

咁經欖隧，話咁快到元朗，阿堯屋企樓下。

「女呀，幫嗲地拖個喼上樓呀，我同僖仔去7仔買啲嘢。」

「嗯。」

之後我同Uncle去咗附近間7仔，佢喺凍櫃攞咗兩罐啤酒去比錢。

「嗱」Uncle遞咗罐啤酒比我。

「err…我一陣要揸車喎。」

「少少唔緊要嘅。」Uncle話。

「咁好啦。」我接過Uncle手中嘅啤酒，飲咗啖。

「僖仔。」

「係。」

「唔洗咁緊張喎哈哈，我唔係嗰啲癡線老豆嚟哈哈」

「嗯，哈哈。」

「我想講呢，堯哩個女好單純㗎喳，你要對佢好啲呀，你知我成日唔喺香港㗎喇，你要陪住佢呀，我交佢比你㗎喇。」

「你咁放心交佢比我，你唔驚我係衰人呃阿堯㗎咩？」

「得㗎喇，我信得你過。」

結果我哋飲哂罐啤酒，行返去堯屋企。

「返嚟喇？你兩個飲咗酒呀？」堯話。

「係呀哈哈哈。」

「無啦啦做咩飲酒呀？」堯繼續講。

「算啦，我同你嗲地喺屋企抖下得㗎啦，你哋去拍拖啦。」

———————————————————————————

作者前幾日通宵太攰無出文，Sorry呀。（＾_＾）