人要惡過車！: 第十三章

排隊期間，我同阿爸傾咗陣計。
阿爸：「阿堯係個幾好嘅女仔呀呵？」
我：「吓？」
阿爸：「我話阿堯係個幾好嘅女仔。」
我：「咁又點？」
阿爸：「咁你記住對人好啲喇。」
我：「吓？乜嘢呀？」
阿爸：「記住比返啲表示人啦。唔好成日要人哋做主動喇。」
我：「其實你講緊啲乜？我完全唔明你想講咩囉。」
阿爸：「聽我講，一陣間買份禮物比人，之後就會明㗎喇。」




我：「無啦啦買咩禮物呀？」
阿爸：「不要問，只要信。」
我：「哦。」
我心諗：「佢究竟想講啲乜㗎？」
泊低㗎車，我哋就上去茶樓會合佢哋。成餐飯都係閒話家常，但係阿堯塊面好似琴日咁紅哂，究竟發生咩事呀？食完飯之後，婆婆去咗同朋友打麻將，阿爸同阿媽去咗行街，佢哋叫我哋自己搞掂。無錯，係要準備行幾個鐘街嘅節奏。

咁我跟住阿堯行咗入間化裝品舖到，佢行嚟行去，好似睇中咗一枝唇膏，但佢想買又唔想買咁，咁我問佢做咩。
我：「隻色幾靚呀。」你覺得我真係識分咩，我鳩up喳嘛。
堯：「你都覺得呀，但係好貴呀。」堯細細聲咁講。
我：「唔緊要啦，鍾意咪買囉。」




堯：「但真係好貴喎。」
我：「咁呀⋯⋯」係喎，阿爸叫我買份禮物比佢喎，「我送比你啦。」
堯：「真係架？」
我：「嗯。」
咁我同佢去咗收銀處比錢。
堯：「多謝你呀。」堯好開心咁笑。
我睇得出佢嗰種笑容係發自內心嘅，令到我都覺得好開心。