人要惡過車！: 第十二章

注意：以下已轉回阿僖視覺。

就係咁，我同阿堯瞓咗一晚，真係純瞓覺，無其他嘢發生。
阿堯：「夠鐘起身啦，快啲起身刷牙洗面啦，你仲要探婆婆㗎。」阿堯企喺床邊叫我起身。
係喎，今日要同埋阿爸阿媽探婆婆喎。
我：「哦。」
我起身刷牙洗面，換埋衫出廳，佢哋三個已經等緊我。
阿堯：「嗱，食啦。」阿堯比咗份三文治我。
我：「哦。唔該。」
阿爸：「一陣間你揸定我揸？」




我：「你揸啦，攰呀，我坐你車得喇。」
咁我同阿爸落街攞車，今日計埋阿堯同婆婆總共有成五個坐車，咁所以唔揸Civic，揸架Freed，而我就喺咪錶位揸返架車泊阿爸個屋苑車位。
婆婆就住喺青衣嗰邊，所以都係要行屯門公路，而我阿爸都係啲癲佬嚟，佢日頭就好啲嘅，行八、九十 ，但佢夜晚係真係可以飛成百二、三，我就好佩服佢可以揸得又快又定。咁我坐車頭，兩個女人坐後面傾計，咁我不外乎都係鬧下啲假日司機亂鳩咁cut線呀，快線撚拉龍呀，尤其係啲左軚FV牌大陸佬同埋啲Tesla，通常哩兩種係最仆街嘅。咁兩，三個字之後到咗青衣，準備接埋婆婆，車門開嗰陣婆婆都嚇咗嚇。
阿堯：「早晨呀婆婆。」阿堯露出佢個招牌笑容。
婆婆：「早晨，你係？」
阿堯：「我係阿僖個朋友，我叫阿堯。」
婆婆：「哦～好啦，去飲茶啦。」
咁去到葵芳，阿媽、婆婆同阿堯去茶樓攞位先，我同阿爸繼續排隊入停車場。