人要惡過車！: 第十一章

咁食完糖水都夜啦，咁阿皓同阿婷直接行返屋企，咁我同其他人就返停車場攞車，咁開車走啦。
阿堯：「喂，咁夜我唔返元朗啦，我去你屋企訓一晚啦。」
我：「吓，你認真㗎？」
阿堯：「我似講笑咩？」
我：「哦，是但啦。」
咁我屋企有兩間房啦，主人房同我自己間房，咁代表我今晚係要訓廳嘅。
返到屋企落下，都係泊咪錶位，咁啱撞返個中學同學，佢都係啱啱泊完車。
我：「喂，揚哥，無見一排，換咗架Z4喎。」我喺度笑
揚：「屌你啦，哩架Supra嚟㗎。」佢都喺度笑
我：「唓，咪又係Z4。點呀，佢咗邊玩呀？」




揚：「啱啱去完camp啫，你呢？」
我：「啱啱食完糖水，喂，走先，下次飲茶。」
咁我就同阿堯返上樓，返到上去開門，我阿爸阿媽坐咗喺度睇電視。
阿媽：「返嚟嗱，後面嗰位喺？」
阿堯：「Auntie Uncle，我叫阿堯呀，係阿僖個同學呀。」
阿媽：「哦～係呀，個衰仔有無蝦你呀？」
我：「我得鬼閒蝦佢咩。」
阿媽：「家陣同你講嘢咩？」
如是者，嗰兩個人喺度傾計，我同阿爸就喺度睇電視。
電視播緊《翻新中古車》，而阿爸就最鍾意睇哩啲整車節目。過多陣，我帶阿堯去我間房，我自己諗住訓廳。