人要惡過車！: 第十章

去到火鍋店，要等幾張枱，咁我同阿皓就傾吓傾啦。
阿皓：「你部Civic幾靚喎，買咗幾多錢呀。」
我：「細細聲同你講呀，唔洗錢㗎。」
阿皓：「你玩呀，唔洗錢？」
我：「你記唔記得阿雯？」
阿皓：「你個班嗰個？」
我：「係呀，架車佢比我嘅。」
阿皓：「吓？佢做咩無啦啦比架車你？」
結果我將個故事講比佢聽。
阿皓：「哦～原來係咁呀。」




咁食飯都係吹下水，抽下水咁啦，仆佢個街嗰三條友爆我中學啲柒事比阿堯聽，結果佢喺度恥笑我，遲吓先同嗰三條友計。食完飯之後阿皓提議去食糖水，咁我哋就揸車去美樂花園。途中阿堯仲喺度笑鳩我。
阿堯：「上堂攞水樽扮波棍比老師鬧我都係第一次聽。」佢大笑。
我：「唉，唔好再提喇，仆街我比佢哋笑足幾年呀。」
阿堯：「咁你中學實大把女啦。」佢奸笑。
我：「唔好傻啦，毒撚哪有女。」
阿堯：「吓嘩，信住先啦。」阿堯偷偷地甜笑。
咁泊低架車，走行去食糖水啦，隔離枱坐咗班後生仔，佢哋全部着住一件寫住輝煌車房嘅T-shirt，但睇落佢哋斯斯文文，又唔似啲MK仔喎。
A：「今晚好似喺大山喎。」
B：「今個月大山咩？唔係林錦咩？」
C：「大山呀，下個月先係林錦呀。」




A：「咁快快手食完過去啦。」
我心諗：「又大山，又林錦，講緊乜呀？」
阿堯：「白痴仔諗緊咩呀，一定係諗緊女仔啦。」
我：「一定係啦，諗緊你呀。」我反佢白眼
阿堯：「⋯⋯」阿堯唔出聲，但係塊面仲紅過蘋果。