人要惡過車！: 第九章

喺揸車返元朗嘅途中，我揀咗行屯門公路，唔行大欖隧道，因為實在太貴啦行大欖，你知窮撚無咁多錢。揸揸下車無啦啦阿堯又問我嘢。
阿堯：「係喎，你今晚諗住食咩？」
我：「同friend打邊爐囉，做乜嘢？」
阿堯：「我嚟唔嚟得㗎？」阿堯突然擺出個係男人都無法抗拒嘅表情。
我：「無所謂呀，你唔會悶咩？」
阿堯：「唔會啦」阿堯微笑。
好彩無行大欖喳，唔係比完五十蚊仲要兜返落屯門就on9。咁啱撞正日落，而屯門公路轉車站前嗰段斜路喺對正嗰夕陽，係就係幾靚，但真係光到差啲睇唔到路，落埋太陽擋都係咁話，嗰陣阿堯係佢個袋度攞咗副偏光鏡出嚟比我。
阿堯：「戴住佢啦，一早知你無預備啦on9仔。」
我：「哦，唔該。」雖然佢話我on9仔，但今次我無打算寸返佢，反而個人覺得好暖好舒服。
嚟到屯市個停車場，前面有幾架車排隊入去，包括架Noah、Prius同部M3，咁我跟著佢哋啦，上到四樓有四個位連住就即刻泊埋去。仆街我同阿Ken阿皓都泊好架車，阿威仲要阿淇幫佢睇位，等佢一落車即刻恥笑佢先。




阿皓：「洗唔洗幫你泊呀威威？」阿皓恥笑佢。
阿Ken：「教你泊都得㗎喎。」
我無出聲，淨係恥笑佢。
阿威：「你班仆街仔笑鳩我，又唔見你哋泊得幾靚。」講完佢自己都喺度笑。
阿婷：「哩位係？」阿婷陰陰嘴笑
阿堯：「Hello，我叫阿堯。」
Cheryl：「哦～僖嫂呀。」Cheryl奸笑
我：「閘住。佢就想。」
阿堯：「慳啲啦，鬼想做你僖嫂。」
結果行去火鍋店嘅途中，阿堯同班女仔有講有笑，咁我自然去搵返班老友。




阿皓：「好嘢喎，上個月仲係毒撚，今個月就有女。」
我：「我都話佢唔係我女朋友咯。」我反佢白眼。
阿皓：「依家唔係唔代表將來唔係嘅。」
我：「屌，同你講都嘥鳩氣嘅。」‍
阿皓：「放長雙眼睇吓點。」又恥笑。