人要惡過車！: 第四章（27/07/2020 Updated Version）

過咗一個禮拜之後，終於嚟到考牌嘅大日子，咁阿皓、阿Ken、阿威三條友突登走堂嚟等我考完牌食飯，咁我嚟到元駕，報到同check咗啲文件之後，就到我考試，等咗等，個考官就嚟到。

「早晨。」

「早晨，咦你咪係上個禮拜嗰個後生仔？」

「係呀我叫阿僖，你係輝哥？」

「係呀，乜你原來未考牌㗎咩，我仲以為你揸咗好耐車添。既然係咁，咁唔洗點考啦，求其喺朗屏兜個圈返嚟啦，阿叔我肚餓趕住食飯呀。」





結果沿途同阿輝吹住水咁遊車河，返到去元駕等咗陣，結果梗係合格啦。

之後我哋翻屯門食Lunch，我繼續坐阿皓車頭，而阿Ken同阿威無揸車嚟，所以坐喺後座，今日我哋去咗食炸雞，貪佢可以坐耐啲。

「喂，有無諗過買咩車先？」皓哥問。

「邊洗買車架，揸屋企人嗰架咪得囉。」阿威笑住講。

「梗係買架性價比高㗎啦。」阿Ken都加一把口。





講真，雖然我鍾意車，我又真係無諗過要買咩車喎。啱啱考到牌無理由揸dream car㗎，萬一撞爛咪大獲，所以我決定上討論區睇吓。

我開咗個po —— P牌仔揸咩車好

快餐店送餐員 : AE110

無得同fc鬥：Jazz啦，細細架P牌仔夠做喇

H車是原罪：Civic正呀





睇完之後我諗我都係揀Civic啦，橫掂我係個H車控。我上咗28Car睇吓有咩放盤。

結果一㩒落去發現有個幾吸引嘅盤

EK4 四門 冠軍白 抬咗B16B機器 1998 機件精神，屋企換車所以平放，有意致電9XXX XXXX



結果我毫不猶豫咁打咗過去。

「喂，我想問係咪賣車呀？」

「係呀，你有興趣？」

咦，係女仔聲嚟？把聲好似咁熟嘅？





「嗯，我想出嚟睇吓架車，下星期一 三點ok嘛？」

「ok呀，到時見。」