人要惡過車！: 第三章（27/07/2020 Updated Version）

阿婷返咗屋企之後，得返我同阿皓喺架車度。

「點呀皓哥，有咩嘢唔比得阿婷知呀？」

「帶你去一個地方，有嘢益你。」

跟著我哋繼承沿住龍門路向前行，去到蝴蝶灣 就轉咗入去個停車場。

「有咩益我呀皓哥？」





「有無興趣試吓架車先？」

「吓，你認真㗎？」

「梗係啦，唔係搵你嚟做咩？」

「玩嘢呀？我牌都未考喎。」

「得啦，依家咁夜龍鼓灘無人㗎啦，





同埋我信得過你手車啦，炒爛咗咪買過架囉，最多油錢我出咯。」

炒爛咗買過架，有錢仔果然唔同啲。

「咁好啦。」

我上咗佢架M3，佢就坐喺隔離，佢架M3係用DCT波箱，同平時學車嘅棍仔Hiace唔同，但係揸上嚟的確係簡單過棍波車。我喺停車場兜咗幾個圈，熟習咗架車就揸出大路，向龍鼓灘方向進發。

一路行，經過內河碼頭一號閘，二號閘，環保園，真係好似阿皓咁講，車都唔多架，嚟到上山前個燈口，我望一望後鏡，有架車從後嚟緊，咁啱轉咗綠燈，我就廢事理佢。





咁去到龍鼓灘之前係要上山先，再落返山先到，嗰條路就無乜街燈嘅，一邊係靠山，另一邊係發電廠嚟。

架M3大燈都已經好光，咁我都廢事再開高燈。我聽到後面啲引擎聲越嚟越大聲，我望望後面，原來佢已經跟住我尾。

我廢事阻住佢，所以落到山即刻打死火燈，扭入避車處讓比佢，但估唔到佢會跟嚟，停喺我後面。

我、阿皓、同後面架車個司機都落咗車，原來佢係揸架白色AE111，TRD包圍、尾翼，車兩旁指揮燈上面貼咗張TRD貼紙。之後佢走行過嚟。



「咦，後生仔你手車唔錯喎，哩條路日日咁多
泥頭車、垃圾車行過，舖滿曬沙石，都揸得咁定，我叫阿輝，有無興趣跟我學下揸車先？」

我考試喇喎，仲學咩車？





「唔洗依家答我呀，哩個我電話，有興趣就打比我啦。」講完佢就比咗張寫咗佢電話嘅紙仔我，然後上車走。

佢走咗之後，我同阿皓吹咗陣水。

「你諗住點？」

「考咗牌先算啦。」

傾完之後阿皓就車返我返歸。