人要惡過車！: 第五章（06/07/2020 Updated Version）

哩個禮拜都係上下堂返下兼職咁，無咩特別。

「喂，聽講你考咗車牌喎，幾時做我柴可夫車我返學先。」阿堯不懷好意咁講。

阿堯係我大學同學，四官端正，扎埋條馬尾，唔識佢嘅人會覺得佢好難接近，但熟嘅人就會知佢真係癲婆嚟，仲要寸過馬撚。

「你唔驚坐我車會撞車死咩？」

「挑，驚條撚咩，最多咪攬炒。」阿堯喺度大笑。





「癡撚線，無你咁好氣，等我買咗車先啦，快啦，又話一齊走。」

「嚟緊啦嘈！」

阿堯都係住大西北，所以我哋有時都會一齊返學放學。

返到屋企，我hea咗陣就出去睇車，嚟到新墟街市後街，等咗陣就聽到啲tec聲嚟緊，睇嚟到啦喎。

架EK4停咗喺到，我就行埋去，但令我最驚喜嘅係落車嗰個人。





「阿雯？」

阿雯係我中學時期鍾意過嘅女仔，佢有塊包包面，又圓又大嘅眼睛，戴副文青幼框眼鏡，我都有追過佢，但中五嗰年去咗外國讀書，今次都係中學後第一次見返佢。

「阿僖？你真係一啲都無變喎。你就係睇車嗰個？」

「嗯嗯。」

車身無花痕，內籠幾新淨，我上車同阿雯喺新墟附近兜咗幾個圈，副B16B真係幾精神，無乜雜聲，反應又快，真係一架靚車。





「你真係捨得賣咗架車？」

「唔捨得就梗有㗎啦，但有咩辦法，屋企人要我換車，話哩啲車cheap喎。」阿雯唔係幾開心。

「咁呀，我會好好錫住架車㗎啦。係呢？價錢方面⋯⋯？」

「架車唔洗錢比你啦，你真係要好好錫住架車呀。」

「咁呀，請你食餐飯都要嘅。」

「咁依家啦，我有啲肚餓。」

夜媽媽得返間廿四M記有開，成日話搵一個肯挨麥記嘅女人，如果佢係我女友，你話幾好呢。

食完之後，我車咗阿雯返屋企。





「我走啦，遲下搵你飲嘢啦。」

「好呀，bye bye」

我揸返架車返歸，泊喺樓下咪錶位，返到屋企就Whatsapp阿堯。

「瞓咗未呀𡃁妹？」

「未呀，搵我做乜？」

「無嘅，問吓你聽日返學洗唔洗車你啫。」

「梗係要啦，你係我柴可夫嚟喎。」





「仆街你真係當我係司機㗎喎。屌你聽朝你屋企樓下等啦。」

「ok，唔好遲到呀你。我瞓啦，早抖啦。」

「早抖。」

覆完之後，我都走去瞓。