《再見了，還會再見嗎？》: 第59章 – 強硬

〜午飯時段〜
 
我一落堂就行咗過去揾阿盈，等埋佢哋三個執好嘢就行得。
 
Anson：「你哋有冇咩想食呀？如果冇就我揀啦」
 
我：「我哋冇所謂呀，你兩個決定啦」
 
「咁去我哋兩個上次食嗰間啦，行喇」
 




喺行去餐廳嘅途中，我哋都係2個2個咁行。
 
Anson同Choco帶頭所以就行喺前面。
 
我同阿盈就跟喺佢哋後面。
 
即使到咗餐廳坐低，我哋都係用咁樣各自1 pair嘅方法坐。
 
「我諗你都知點解我哋會約你哋出嚟㗎啦？」Choco對坐喺對面嘅我哋講。
 




阿盈喺呢個時候撞一撞我手臂，示意已經俾人發現咗我哋之間嘅關係。
 
既然阿盈都撞我手臂，咁唯有我答啦。
 
「因為想同我哋食飯？」我回應Choco。
 
旁邊嘅阿盈即刻踩一踩我。
 
然後忍唔住出聲，
 




「你哋係咪知我哋一齊咗喇？」
 
估唔到阿盈反而係忍唔住出聲先。
 
「你哋終於肯認喇咩？」Anson對我哋兩個講。
 
到底佢哋有啲陰謀呢，要特登約我哋食飯出嚟講。
 
「不嬲都冇唔肯講，只係你哋冇問啫」阿盈回應。
 
而家個情境其實都幾僵，好似雙方各不相讓咁，但又唔係真係鬧緊交。
 
我已經唔知點處理呢個情況，都係交埋俾阿盈處理啦，畢竟佢處理呢啲嘢嘅經驗都總算多過我。
 
「有咩陰謀啊你兩個，一次過講埋啦」阿盈單手托頭再望住佢哋兩個。




 
阿盈一出聲，就好似即刻搶返主導權，突然調返轉審問佢兩個咁。
 
果然係平時傾開嘢嘅人，到呢啲時候都硬係有種氣勢喺到。
 
不過我真係好少見咁樣嘅阿盈。
 
「唔使咁惡嘅…… 好好地傾咪得……」Choco好似有少少驚。
 
「係囉係囉……」我幫佢哋兩個求情。
 
跟住我伸手攬一攬阿盈條腰。
 
「見係車仔同你哋求情，我放過你哋啊，不過都要講清楚係咩事」
 




跟住Anson首先開口。
 
「咁我哋知道你哋兩個一齊咗，諗住同你哋食餐飯確認下啫」
 
我覺得應該唔止咁少嘢嘅，一定仲有啲嘢未講。
 
「唔想再好似擠牙膏咁叫一句講一句喇，快啲一次過講埋佢然後開開心心食飯啦」
 
阿盈再次出聲……
 
我就當然繼續乜都唔講啦。
 
「冇咩…… 只係想睇下你兩個幾時得閒，再4個人一齊約出嚟出下街啫〜」
 
搞咗咁耐佢哋終於肯講自己嘅目的。




 
「一早講嘛，咁咪和平好多囉」
 
阿盈終於變返正常嘅樣。
 
「你幾時得閒啊？」阿盈挨住我膊頭問我。
 
「星期六/日囉，只要早啲約嘅話我都應該ok嘅」
 
「咁你哋呢？」阿盈問佢哋兩個。
 
「我哋兩個就幾時都得啦，平日都冇咩做嘅〜」
 
「係囉」Anson和應Choco。
 




「咁你哋兩個揀活動啦」阿盈對佢哋講。
 
「做運動好唔好？」Choco提議。
 
發現佢哋兩個除咗做運動就係做運動，都冇其他興趣嘅。
 
短短一分鐘我已經想像到佢哋平日嘅相處係有幾咁苦悶。
 
其實可能係唔悶嘅，只係我對做運動冇咩興趣啫。
 
「車仔你得唔得啊？」阿盈問我。
 
睇怕阿盈都係知道我對運動冇咩興趣，所以先會咁樣特登問我。
 
講真嗰句，我又冇話對做運動特別抗拒嘅，但只係唔會想刻意去做囉。
 
除咗游水。
 
所以都係大家開心就好啦。
 
「我緊係冇問題啦，運動健將嚟㗎我！！」
 
「我同你同班第三年都未見過你玩陸運會啲嘢喎，咁都叫運動健將啊？」Choco恥笑我咁講。
 
「你因住我跑得快過你啊〜」我回應。
 
「呢句我又真係唔信你喎，話晒人哋Choco都係校隊，要出去幫學校比賽㗎喎，你邊到夠跑呀〜」
 
連阿盈都笑我……
 
「到時跑下咪知囉〜 我就支持我女朋友嘅」Anson回應
 
「我就唔支持我男朋友嘅。喂，啲嘢食凍喇，食嘢先啦〜」