《再見了，還會再見嗎？》: 第58章 – 早會反思

今日一返到學校就要去早會嗰個頒獎典禮。
 
為咗唔好遲到，所以我都比平時早咗15分鐘返去。
 
原本諗住同阿盈一齊返去㗎，但打電話俾阿盈嗰陣，佢話佢可能會遲到，所以叫我自己返咗先。
 
返到去嘅時候，我見仲有啲時間，就去咗課室放低袋。
 
點知Choco同Anson一齊行咗過嚟。
 




「一陣Lunch Time一唔一齊去食飯啊？」Anson問我。
 
我心諗平時都係一齊食㗎啦，做咩突然之間要行過嚟問呢？
 
「得啊，做咩呀？」
 
「記得叫埋阿盈嚟喎〜」
 
「我哋4個人一齊食啊」Choco補充。
 




又會無啦啦4個一齊食飯，一定有啲古怪。
 
唔通佢哋已經知道我同阿盈一齊咗，但係佢哋冇理由會估到㗎喎。
 
我除咗小雲之外都冇同過其他人講啦。
 
「哦，咁我一陣叫埋阿盈啦。我落去準備早會先，一陣再傾」
 
講完呢句我就離開咗課室。
 




行落禮堂嘅時候我一直諗，到底點解佢哋會知道㗎呢？
 
我諗應該佢哋都係尋日喺課室睇到我同阿盈啲互動？
 
但係佢兩個係一放學就會即刻走，然後一齊去做運動㗎喎。
 
呀！！
 
真係諗極都唔明。
 
可能係阿盈同佢兩個私底下講咗啫。
 
冇事嘅。
 
入到禮堂，原來阿盈都已經到咗。




 
「車仔，我幫你點咗名㗎喇，你直接排隊啦」阿盈喺台前對我講。
 
我加快腳步向阿盈嗰邊行，再揾返自己個位置排返入隊。
 
過咗10分鐘，啲同學漸漸由課室行咗嚟禮堂。
 
望住禮堂嘅人逐漸變多，開始有啲驚驚地。
 
原本綵排嘅時候都冇咩驚，但係望住啲人愈嚟愈多都咪話唔恐怖。
 
終於都到咗正式開始早會嘅時間。
 
「歡迎大家嚟到今個學期嘅頒獎……」
 




時間真係過得好快，10分鐘都冇就已經頒晒中一同中二嘅獎。
 
一諗到好快就會到自己上台，又有少少心跳加速。
 
望住Zoe，望住阿盈，佢哋一個接一個上台好似完全唔緊張咁，真係好佩服。
 
「跟住落嚟頒發嘅係中三級數學科……」
 
我聽到司儀嘅呢句說話，就開始由舞台旁邊嘅樓梯慢慢行上去。
 
迎接我嘅係企喺台中間嘅校長。
 
佢露出一個好虛偽嘅笑容望住我，望到都覺得嘔心。
 
我跟住尋日綵排教嘅指示，一行到上台首先鞠躬，跟住握手，細聲講聲多謝，再向台下鞠躬。




 
原來喺台上嘅感覺係咁樣。
 
做出一連串生硬嘅動作後，只係想盡快行返落台下面。
 
望住台下一大班人為自己拍手掌，心入面都不禁有啲沾沾自喜。
 
又諗返自己前兩年原來就係喺台下拍手嘅人，但就對呢啲頒獎典禮冇乜印象。
 
我諗我自己當時嘅心態，應該都只係想快啲完咗個典禮，然後快啲返課室休息。
 
作為一個喺台下旁觀嘅人，理得台上面嗰個係邊個咩。
 
又唔係自己攞獎，好似俾人罰嚟拍手咁。
 




所以如果你問我，我會覺得呢啲頒獎典禮都幾無謂。
 
話就話係為咗表揚啲考得好嘅同學，但事實上台上嘅同學又未必係好享受，台下嘅同學更只係嚟做一部拍手機器。
 
老實講，照我所見喺台上拎獎嘅人，十有八九都已經係常客，佢哋都只係當個典禮係例行公事。
 
落返台下，阿盈已經喺後台嘅位置等緊我。
 
「第一次上台拎獎覺得點呀？緊唔緊張呢？」阿盈笑住咁問。
 
啱啱嘅感受都係收喺心入面啦，冇必要樣樣嘢都講出嚟啫。
 
「點會唔緊張呀，要喺台上面對咁多人喎……」我若無其事咁講。
 
「係喎，啱啱Choco同Anson叫我哋4個人一齊食飯喎，你ok㗎嘛？」
 
「點會唔得，有你一齊食我就ok啦〜〜」