《再見了，還會再見嗎？》: 第60章 – 合唱團

放咗學之後，我同阿天照平時咁落去合唱團練習。
 
入到去音樂室，我照舊行去Lily隔離嘅位置。
 
個人都未坐低，Lily就已經開聲問我嘢，
 
「做咩尋日唔覆我啊？」
 
係喎，尋日Lily揾過我，但係因為我懶得起身所以就冇覆到。
 




「尋日我好早瞓咗喇，咩事揾我啊？」
 
「諗住問你參唔參加上星期講嗰個啫，一陣就要報名喇嘛」Lily回應我。
 
死，唔記得咗諗呢樣嘢添。
 
話說上星期練習完嗰陣，
 
「大家留一留低先，我有少少嘢要同大家宣佈」負責老師對我哋所有人講。
 




唔知係咩事呢，平時明明一練完佢就會一支箭咁衝返落教員室執袋走，總之有咩都係聽日再傾。
 
今日竟然會一反常態，叫我哋留低？
 
唔通我哋終於有比賽參加？
 
「你估係咩事呢？」坐喺旁邊嘅Lily問我。
 
「唔知喎，可能係有比賽玩下？」
 




「點會丫，佢咁多年嚟都話報唔到名，我懷疑根本就係佢懶得幫我哋報名」Lily講完嘆一嘆氣。
 
話說我都入咗呢個合唱團第3年，但係就一次比賽都冇出過去，真係唔知一直練埋練埋啲歌係為乜。
 
每年嘅唯一一次“出動”，就係喺個中六嘅畢業典禮到做領唱。
 
仲要只係帶全場一齊開始唱聖詩，啫係字同音完全唔夾嗰啲教會歌。
 
我一直都覺得聖詩讚美下神同上帝呢啲行為都係好事嚟嘅，不過啲歌就可以作得好聽啲咁啫。
 
「今年呢，就係我哋學校嘅創校40週年，所以將會有一個表演活動。而學校就想我哋喺嗰日唱下歌，為呢個校慶增添一啲色彩」
 
到底唱歌可以增添咩色彩呢？
 
我就真係諗極都唔明喇。




 
「咁今次呢個校慶表演呢，就唔係所有人都要參加嘅，總之有興趣嘅人就嚟同我報名啦
 
「咁今日就係咁多喇，最遲要喺下星期嘅練習前要俾到答覆我」
 
「冇咩問題咁我走先喇，下星期見〜」
 
然後就一支箭咁離開咗音樂室。
 
結果隔咗一個禮拜，我已經將件事忘記得一乾二淨，喺過去7日連諗都冇諗過呢件事。
 
「如果係有興趣參加校慶表演嘅，麻煩出嚟寫返個名俾我預個人數」 負責老師對我哋所有人講。
 
我望一望阿天。
 




阿天又望返住我，用好似求我出去報名嘅眼神望住我。
 
我向阿天側一側頭再反白眼，表示我呢刻嘅無奈。
 
「我諗我應該會參加啊」我對Lily講。
 
「咁我出去幫你寫埋名啦〜」
 
「好啊〜 唔該〜」
 
阿天會咁嘅樣望住我，係因為無論我哋幾多人參加，佢都一定要留低練琴。
 
啫係就算我哋冇朋友陪佢一齊放學留低，佢都要同一班完全唔熟嘅合唱團團員一齊做額外練習。
 
咁我就好有義氣嘅，既然阿天都咁嘅樣望住我，我都唔好意思唔報名啦。




 
「原來都有唔少人報名喎〜」Lily行返嚟之後同我講。
 
「咁緊係啦，去表演一次就可以拎一個優點喎，大家仲唔仆到咁去咩」我回應。
 
「我就唔希罕呢啲嘢嘅，儲埋儲埋啲優點又唔見得有咩用」
 
「咁你又會走去做Prefect嘅？冇著數㗎喎」我問Lily。
 
「你又知我有做Prefect嘅？」Lily反問我。
 
其實我都係某次偶然偷睇到阿盈張秩序紙，上面咁啱有寫住Lily個名我先知㗎咋。
 
唔好誤會呀，我絕對唔係特登去留意佢！！
 




「你理得我點知，總之我就知啦」
 
「唓，懶係神秘咁。我都係有興趣先做咋嘛，平日又冇咩搞，所以咪諗住貢獻下學校囉」
 
「大家保持安靜喇！！唔該司琴〜」
 
琴聲跟住響起，大家亦自動自覺收聲，開始今日嘅練習。