《再見了，還會再見嗎？》: 第57章 – 聊天室

當晚返到屋企，我收到嚟自小雲嘅message。
 
小雲：「Hello〜 你得唔得閒傾下偈啊？」
 
唔知小雲咁夜揾我咩事呢？
 
我：「我ok啊，做咩咁夜都揾我嘅？」
 
小雲：「冇咩嘅，好似好耐冇同你傾過偈，想揾下你啫」
 




我：「近排都冇咩特別嘢忙啫，學期都係啱啱開始」
 
小雲：「咁又係，我近排都係冇咩搞。恭喜返你拎咗科第一先啦！！」
 
我：「都係好彩啫」
 
小雲：「咁你冇返咁上下努力都唔會拎到嘅」
 
唔知點解，我硬係覺很今次同小雲傾偈好似好奇怪。
 




應該話係好生硬？
 
唔知仲以為我哋啱啱識咗冇耐。
 
唯有我揾啲話題同小雲傾下啦。
 
我：「係呢，你諗住下年揀咩科啊？」
 
小雲：「我諗我應該會揀中國文學同中史啊。因為我對嗰啲理科又冇乜興趣，而且成績又一般」
 




呢個決定都幾合乎小雲嘅常態嘅。
 
小雲本身就係啲鍾意寫好多字嘅人，所以呢啲文科就啱晒佢啦。
 
我：「都好啊，揾到自己有興趣嘅科嚟讀，但係學校要揀3科喎，淨低嗰科你未諗揀咩？」
 
雖然我都係淨係諗到2科想讀，不過都照問下啦。
 
小雲：「淨低嗰科我未諗到啊。咁你呢，有冇邊啲科係特別有興趣？」
 
我：「我覺得自己對科學嗰啲都算係有興趣嘅，所以諗住揀物理同化學囉」
 
小雲：「唔揀埋生物嘅？」
 
我：「唔啦，雖然呢科個成績唔差，都叫做拎到個全級頭十，但始終覺得唔啱自己讀囉」




 
小雲：「點解啊？都係背啲嘢再答下題目啫，感覺唔難㗎喎」
 
我：「你都唔係唔知㗎啦，我本身就唔係幾鍾意背書，再加上我又冇興趣去讀人呀動物呀，嗰啲咁嘅構造」
 
小雲：「咁睇嚟你都揾到自己嘅興趣啦。我諗你應該都會揀埋M1/M2嗰啲數學掛」
 
小雲：「話晒都科第一喎你，你都讀唔到嘅話，都冇乜邊個可以讀到啦，最多到時唔啱咪drop囉」
 
小雲講嘅嘢都有道理嘅，到時唔鍾意咪drop囉。
 
我：「其實我真係冇諗住揀嗰啲M1/M2，一係我遲啲去揾陳sir傾下囉，咁樣好似好啲」
 
小雲：「係呢，你係咪已經同阿盈一齊咗喇？」
 




竟然會單刀直入咁突然問呢樣嘢，唔太似小雲平時嘅作風喎……
 
我窒咗一窒，然後回應。
 
我：「係啊…… 你又會知嘅？」
 
突然，我收到Lily揾我嘅通知。
 
應該唔係咩緊要嘢掛，都係一陣先覆啦。
 
小雲跟住好快就覆返我。
 
小雲；「點會唔知，你哋今日喺班房咁明顯」
 
小雲：「恭喜晒你哋啊〜」




 
我：「你咁講搞到我好尷尬…… 我又點會知阿盈會咁㗎啫……」
 
小雲：「一齊咗幾耐呀？收收埋埋又唔話俾大家知」
 
我：「我都冇特登唔講…… 你唔覺特登揾人講話同阿盈一齊咗會好奇怪㗎咩？」
 
小雲：「咁你都啱嘅〜 不過你哋兩個都係我好朋友，我見到你哋一齊咗，我都會開心㗎〜」
 
唔知點解呢句好似有啲奇怪，好似特登強調某啲嘢咁。
 
算喇，都係唔好諗太多。
 
我：「你都唔好話俾其他人知住啊，阿盈佢好似話唔想喺學校咁公開」
 




小雲：「你哋咁都叫唔公開咩XD 今日應該已經令到全班都知啦，仲話唔公開」
 
又好似係喎，今日阿盈咁鬼張揚……
 
小雲：「好啦，夜喇。我瞓先喇，聽日喺學校再見啦〜」
 
我：「早抖〜」
 
跟住我就攤咗上床休息。
 
一攤上床，就醒起啱啱Lily揾過我。
 
唉，今日已經好攰，聽日早會仲要上台拎獎。
 
我都係早啲休息算，聽日再睇下Lily揾我係咩事啦。