《再見了，還會再見嗎？》: 第37章 – 我倆

「我哋一陣6個人一齊玩好冇啊？」阿盈提議。

6個人係指緊Anson, Simon, Choco, 小雲，阿盈同我。

話說前排阿盈同其他班會主席傾完，個結論係全級一齊去海洋公園。

都好嘅，反正都好耐冇去過。

阿天同雯雯一早就已經人影都唔見埋。





去得主題樂園，就緊係2個人去二人世界啦，仲同我哋玩咩。

「我同Choco兩個去玩喇，你哋幾個玩得開心啲啦」Anson對我哋4個講。

講完之後Choco就繞住咗Anson隻手。

除咗小雲之外，其他人包括埋我，都覺得好驚訝。

阿盈：「你哋2個鬼馬喇，幾時一齊㗎？」





Anson：「半個月左右啦，不過驚就咁講出嚟會好奇怪，所以咪一直都未講囉」

阿盈：「扮晒嘢啦，明明就係想瞞住唔俾我哋知」

Anson：「我哋走先喇，如果一齊食飯就call我哋啦」

跟住就漏低咗我哋4個喺到。

我：「咁不如我哋都去玩啦，你哋想玩咩先？」





小雲：「過山車啦，唔刺激邊到好玩㗎」

識咗咁耐先知小雲原來鍾意玩啲咁刺激嘅嘢……

Simon：「好啊，我都好耐冇玩過過山車。行啦阿盈車仔」

一路行嗰陣我見小雲同Simon都好雀躍咁討論之後玩咩機動遊戲。

老實講，我就冇咩興趣，所以就唔係好join到佢哋對話。

明明我哋有4個人，點解硬係好似少咗個咁嘅呢？

我望一望，原來阿盈一直跟住喺後面但係冇出聲。

見佢好似唔開心咁，我決定去聊下佢講嘢。





「做咩跟住喺後面又唔出聲呀？」我主動問阿盈。

「我唔敢玩過山車㗎……」

根據阿盈把聲嘅震動程度，我都幾肯定佢係驚玩呢樣嘢。

「其實我都唔玩㗎，不如我哋偷偷地走啦……」我對阿盈講。

因為我對機動遊戲嘅嗰種冇興趣，就係可免則免。

啫係如果我有得揀，我就一定唔會玩囉。

如果逼住一定要玩，咁我又唔會話驚到瀨晒尿咁唔敢玩嘅。





阿盈佢一捉住我隻手，就拉埋我一齊走咗。

小雲同Simon兩個好似冇發現我哋向咗反方向走，繼續向過山車嗰邊行。