《再見了，還會再見嗎？》: 第38章 – 雷𩃀節拍

「我哋去睇熊貓好冇呀？」阿盈問我。

「哦，我冇所謂呀」

結果成個中午我就係跟住阿盈睇晒成個海洋公園嘅動物。

「不如去食嘢囉？我有啲餓喇」阿盈對我講。

「食M記？附近啲餐廳好似有啲貴」我提議。





問完嗰下都有啲怕，畢竟唔係每個女仔都鍾意食呢啲快餐店。

「我正想咁講，真係冇乜錢食呢到啲野。百幾蚊一個餐，不如去搶！！」

我哋買完個餐就喺附近啲長櫈坐低咗。

「估唔到你咁鍾意睇動物喎……全個海洋公園都俾你睇晒喇」我一邊食嘢一邊講。

「唔係㗎，我諗住一陣食完嘢就去玩下啲輕鬆嘅機動遊戲」





「乜你有嘢啱玩咩？」我問返阿盈。

「點會冇，一陣我帶你去玩我最鍾意玩嗰樣啦」

阿盈講完呢句，輕輕打咗我一拳。

食完嘢我又繼續跟住阿盈周圍去。

作為一個有選擇困難症嘅人，都係同啲有主見嘅人一齊舒服啲。





起碼咩都有人幫我決定好晒，淨係跟住指示做嘢就搞掂。

「車仔，我哋玩呢個丫」阿盈指住前面寫住“雷霆節拍”嘅牌。

「咩嚟㗎呢個，你又話唔玩機動遊戲嘅？」我問阿盈。

「好玩㗎，不過你要坐出面喎」

阿盈一邊講一邊奸笑，睇嚟事情並唔簡單。

行到埋去睇，原來只係一部不斷圍住中間轉嘅嘢。

部嘢睇落都冇乜特別，輕鬆啦。

我讓咗阿盈入先，然後我坐喺佢旁邊靠外嘅位置。





過咗半分鐘架嘢就開始轉動。

我心諗，都係好似旋轉木馬咁冇乜特別啫。

啱啱仲講到話幾緊張咁，話咩我一定要坐出面，睇嚟又俾人呃咗。

過咗十幾秒，架嘢開始慢慢加快。

啲離心力漸漸愈嚟愈勁，阿盈俾架嘢fing到成個人壓晒落我到。

我手臂開始有啲痛，但架嘢依然愈轉愈快。

望住阿盈個樣，完全唔明點解佢可以咁享受，仲一邊玩一邊大叫歡呼。





相反我就俾佢壓到鬼死咁痛。

如果佢係阿天，我一定鬧到佢傻呀！

幾經辛苦，終於捱過咗呢分幾鐘嘅時間，

雖然呢架嘢唔算話好刺激，但真係玩得好辛苦囉。

「不如趁冇乜人，我哋排隊玩多次咯」阿盈好似雙眼發光咁對住我講。

問心講，我真係好想拒絕。

但係人哋女仔開到聲要求，我話唔想玩又好似好衰。

「啱啱玩得唔開心咩，做咩好似反應咁呆滯嘅」阿盈問我。





「冇咩啊，再玩囉，我ok啊」

「咁行啦」

阿盈捉住我隻手跑返去排隊嗰到。

等咗兩輪又到返我哋玩。

好懷念當年冇咁多遊客嘅海洋公園，唔會話周圍都人山人海，周圍都係講普通話嘅人。

呢個時候真係想玩乜就玩乜，最多排個十幾分鐘就有。

邊似而家可以排成半粒鐘先有得玩一隻game，然後玩唔夠十個又話天黑要走。





唉，老嘢硬係鍾意懷緬下過去，都係講返個學校旅行先。

坐咗上架嘢之後，阿盈問我，

「係咪頭先我壓住你太辛苦呀？」

「少少啦……」我唔敢直接話係。

「出聲嘛」

跟住阿盈拎起我隻右手放上佢膊頭搭住，然後再將成個人挨落我到。

好緊張……唔敢左右亂咁郁……

「做咩個心扑扑跳得咁快，唔挨到埋你心口都feel到喇」阿盈一邊笑一邊講。

「冇試過女仔挨落嚟啫……」

「我仲以為小雲同你咁熟會有試過添，哈哈。開始郁喇！！」

今次呢轉同啱啱嘅好唔同。

應該咁講，係個感受好唔同。

今次雖然都係俾阿盈壓到抖唔到氣同有啲辛苦。

不過佢今次全程都係靜靜地挨喺心口到，冇咗上次玩嘅嗰種興奮。

而我只係好似啲情侶咁搭住阿盈膊頭，好似保護住佢咁嘅動作。

講明先呀，我同佢只係平日傾開偈嘅普通朋友嚟㗎咋！！

雖然周圍嘅環境同音樂都好嘈好熱鬧，但都唔影響我呢刻嘅感覺，原來俾人挨住都可以咁舒服。

過咗分幾鐘音樂就停咗，我哋亦離開咗架嘢行返出外面。

「你仲有咩想玩啊？」我問阿盈。

其實都玩得七七八八，係差啲刺激嘢未玩啫。

「去坐返纜車落山啦，差唔多要坐旅遊巴返去喇」

阿盈原本好似有啲嘢諗緊，然後又好似突然諗通咗再回應我。

「行啦〜」