《再見了，還會再見嗎？》: 第36章 – 數學書

係喎，有啲嘢未同大家提過。

話說升咗上中三，教開我嘅老師全部都換晒。

個數學老師變咗做一個60幾歲嘅老屎忽。佢講嘢一舊舊都算，仲要我哋2人一組做閱讀報告。

話說嗰日唔知呢個郭sir發咗咩神經，要我哋做數學閱讀報告。

心諗，數學邊有書睇㗎，計㗎咋嘛，條友都傻傻地。





我見係2人一組，咪諗住揾下我附近嘅人囉。

點知小雲同咗Simon一組，Anson又話同Choco一組，而阿天同邊個一組就唔使我多講啦。

完完全全覺得自己係被朋友徹底拋棄咗囉。

呢個時候阿盈行咗過嚟，

「咁孤獨嘅你，同唔同我一組呀。不過我啲數學廢到不得了，應該連你一半都冇，哈哈」





「我冇咩所謂嘅，都係睇書寫返啲內容感想啫」我回應。

「希望我唔會拖累你啦〜」阿盈講完尷尬地向我伸一伸脷就走咗。

當晚我返到屋企就send咗個訊息俾阿盈，

「Hello~ 嗰個閱讀報告2個星期後就交喇，不如我哋今個weekend去揀定本書，然後下星期一齊睇啦」

阿盈好快就覆返我。





「星期六2點圖書館等？」

「到時見啦〜」

〜星期六〜

去到圖書館門口，我打咗個電話俾阿盈。

「我到咗圖書館喇，你喺邊啊？」我問阿盈

「我喺入面廁所啊，啱啱睇過下啲書，但係我本本都睇唔明呀，今次真係靠你喇」

「咁我入去睇下先啦，喺MATHEMATICS嗰欄等啦」

去到個書櫃，我隨手攞起咗本叫“Algebraic Geometry – A First Course“





前2年學過少少Algebra，又學過下Geometry，我諗應該ok啦。

仲要寫明係First Course，應該入門嘢嚟㗎啫。

一揭開，點解乜都睇唔明嘅。

除咗Exercise嘅題號之外就一個數字都見唔到……

「Homogeneous Quadratic Polynomial？？？Tangent Space？？？」我自言自語。

呢啲咩嚟㗎，都未學過嘅。

「車仔，乜你睇得明呢啲㗎？我啱啱就係睇呢本睇到頭都暈，所以就決定去廁所洗個臉」





阿盈啱啱喺我睇緊書嘅時候行咗返嚟。

「我點會識睇……成本都係鬼畫符嚟嘅，同我哋本教科書相差咁遠。我原本以為好似平時啲數學書咁一大堆題目㗎咋」

我放返低本書，嘗試再揾本易啲。

過咗一陣，

「車仔，呢本好似幾有趣喎」

阿盈遞咗本書俾我，個標題係“Real and Unreal Numbers”

我隨手揭下前面嗰啲，好似都幾易明。

「我都覺得ok啊，咁我哋做呢本啦」





「好啊〜」

「靠晒你喇〜」

而家我每日一有時間就會拎本書出嚟睇。

其實係咪得我一個咁蠢，做閱讀報告係真係會睇本書嘅內容㗎呢？？

唉，算喇，唔蠢都蠢咗。

有日放學我落咗間細房睇緊本書，阿盈行咗入嚟。

「我使唔使幫下你睇啊？？要你一個人做晒好似好衰喎」阿盈擔心地問。





其實我真係唔介意，因為自己都算係幾有興趣去學入面啲新嘅嘢。

「唔使啦，你想咪坐喺我隔離一齊睇囉」

你哋係好想知小雲喺邊呢？

小雲呢排都忙住同Simon一齊傾呢份project，所以放學之後都冇同我一齊落嚟啊。

不過唔緊要啦，大家各自識多個朋友啫。

講返阿盈先，

阿盈雖然好有心咁話嚟一齊睇本書，但佢望咗唔夠10分鐘就瞓著咗。

我都唔怪佢嘅，畢竟佢喺咁多科入面最差就係數學，情況同我個中文差唔多，甚至更差。

佢瞓瞓下打咗個乞痴醒咗。

「Sorry啊，我仲話落嚟陪你睇添，點知瞓著咗」阿盈一邊講一邊同我道歉。

平時真係冇幾可會見到阿盈咁柔弱嘅一面。

由識佢到而家都一個幾月，佢俾人嘅感覺一直都係一個好強勢嘅人。

無論喺咩地方都係一個leader嘅角色，帶住佢嘅組員解決所有問題，亦同時會做一個大姐姐嘅角色關心身邊嘅朋友。

「你攰就休息一陣，我俾件冷衫你啦」

我將件冷衫鋪喺佢背脊。

「唔該車仔，辛苦你喇」

「你都辛苦喇」

佢講完句嘢又瞓返著。

聽講阿盈啱啱嗰2個鐘，係去咗同其他班會主席傾下星期學校旅行嘅事。

班會主席呢啲辛苦位...... 

真係俾錢我都唔會做……