《再見了，還會再見嗎？》: 第35章 – 校園日常

〜開學後第二星期〜

「點解你過完個暑假返嚟好似黑咗咁嘅？」小雲無啦啦問我。

「咁你都留意到嘅，我暑假去咗學游水呀，估唔到又幾好玩」

「我都想學啊，不過硬係冇乜機會」小雲扁起個嘴講。

「我教你咪得囉」Choco突然間行咗過嚟。





講開又講，Choco除咗玩田徑隊，仲係學校游泳隊代表嚟。

「呢啲先係高手嘛，幾時先輪到我出聲啫」我講笑咁講。

「我都係講下笑咋，唔阻你兩個傾偈喇我」

行過嚟傾一兩句又走……

「車仔，你兩個同唔同我哋食Lunch啊？」阿天喺隔離問我。





「我冇所謂呀，小雲你呢？」

「我都係同你食咋嘛，四個一齊囉」

「咁行啦」雯雯拖住阿天企咗起身。

以前見到佢哋喺學校拖住行會覺得好古怪，仲會替佢哋擔心。

而家見慣見熟咗，反而覺得佢哋拖住行先係正常。





雯雯：「呢排見Anson同Choco好似幾啱傾喎，你估佢哋有冇機會呢」

阿天：「聽日同Anson練波嗰陣同佢傾下密偈先〜」

我：「乜你有打波㗎咩？我以為你淨係彈琴㗎咋喎」

阿天：「喂，我羽毛球校隊嚟㗎，咁樣睇小我嘅」

真係睇唔出喎……

小雲：「話時話，前排阿盈叫我陪佢一齊做領袖生喎，你哋有冇興趣呀？」

呢啲嘢都係唔好搞我，最憎企喺到管人管秩序。

雯雯：「佢成日都叫人去玩埋啲leadership嘢嘅，咪鬼理佢啦」





阿天：「係囉，佢都已經做第三年班會主席，而家又去做Prefect，睇嚟遲啲應該會選埋學生會㗎喇」

聽落好似好猛料喎……

小雲：「但係我真係有興趣想試下喎〜」

我：「乜你唔係唔鍾意阿盈㗎咩？」

小雲：「邊個話㗎，我而家晚晚都同佢傾偈㗎喎〜〜」

阿天：「車仔唔好理小雲啦，佢俾阿盈荼毒咗，冇得救㗎喇」

唔知點解呢句嘢好好笑，好似講到阿盈生人勿近咁。





話說前幾日阿盈都有喺Facebook揾過我，

「車仔，我係阿盈呀。遲下我會喺班入面投票叫大家揀秋季旅行地點，你有冇邊到有興趣呀？」 

「都係不外乎海洋公園或者去啲咖啡灣/蝴蝶灣BBQ㗎啦」

「我問緊你意見呀 XD」

Errr…… 揀邊到好呢……

「海洋公園啦，好似幾啱一大班人去玩」

「你好鍾意去主題公園玩㗎？」

「唔係呀，我…」





結果就同阿盈佢傾咗成晚。

跟住嗰幾日我都有同阿盈傾，我發現佢係嗰種你永遠冇可能同佢傾得完偈嘅人，因為佢會有源源不絕嘅話題同你傾。

雖然我形容到佢好似啲瀨死唔走嘅麻煩友咁，但實際上你同佢傾落嘅時候，卻唔會覺得佢好煩厭或者唔想覆佢。

可能呢啲就係真正嘅識得同人溝通啦。

～星期五～

放學後，我照常去合唱團練習。

「車仔，乜你都係choir㗎？」





問我嘅人係Lily。

去到第三年先好似第一次見佢咁，哈哈。

「同你一樣都係Soprano添」我回應。

「點解好似前兩年都冇見過你咁嘅」Lily突然問我。

呢個問題應該係我問你先啱囉。 

「我夠冇見過你啦」我應返佢。

「睇你都冇朋友一齊Choir㗎啦，過嚟一齊坐啦」

講到好似自己有咁，明明佢都係冇先叫我一齊坐。

「我有朋友囉，只不過佢喺出面彈琴咋嘛......」

「笑死，咁你出去同佢坐啦」

玩我咩......

我反起白眼表示無奈。

「講下笑啫，話晒我哋都係groupmate，玩下都唔得咩」

「安靜啲喇，我哋而家開聲先」指揮對我哋所有人講。

完咗練習之後，我同阿天一齊走。

「見你同個女仔都幾好傾喎，點識㗎」阿天問我。

要點講好呢，我又唔可以話佢知係改進計劃到識。

「Er......前排佢幫完我就做咗朋友喇」我口窒窒咁講。

「下次諗個好啲嘅大話啦，真係唔明點解你可以去都邊都識到新女嘅」

我都冇特登識，只係咁啱合作做嘢啫。

「我都冇特登識，真係咁啱㗎咋」

「識女識到你咁串，小雲知道實嬲死」阿天笑住咁講。

「佢邊有咁小氣，你都傻嘅〜」

「你先係真係傻嗰個……」